सिलिगुरी-पश्चिम बंगालच्या मुख्यमंत्री ममता बॅनर्जी यांनी पंतप्रधान नरेंद्र मोदी यांच्यावर पुन्हा एकदा घणाघाती टीका केली आहे. तुम्ही पाकिस्तानसोबत नेहमी भारताची तुलना करता, भारताचे पंतप्रधान आहात की पाकिस्तानचे ब्रॅण्ड अॅम्बासिडर आहात, असा सवाल त्यांनी पंतप्रधान मोदींना केला.
सिलिगुरी येथे सुधारीत नागरीकत्व कायद्याविरोधात मोर्चा काढण्यात आला होता. त्यावेळी झालेल्या जाहीर सभेत ममता बॅनर्जी यांनी केंद्र सरकारवर आणि भाजपवर जोरदार टीका केली. भारत हा मोठा देश आहे. आपल्या देशाला महान संस्कृती आणि वारसा लाभलेला आहे. मात्र, पंतप्रधान मोदी दरवेळेस आपल्या देशाची तुलना पाकिस्तानसोबत करतात. नक्की मोदी हे भारताचे पंतप्रधान आहेत की पाकिस्तानचे ब्रॅण्ड अॅम्बेसिडर आहेत असा प्रश्न उपस्थित करत पंतप्रधान दरवेळेस कोणत्याही मुद्यात पाकिस्तानसोबत तुलना करत असतात, असा टोलाही ममता यांनी लगावला.
गुरुवारी कर्नाटकमध्ये झालेल्या जाहीर सभेत पंतप्रधान नरेंद्र मोदी यांनी सुधारीत नागरिकत्व कायद्याविरोधात सुरू असलेले आंदोलन हे संसदविरोधी आंदोलन असल्याचे म्हटले होते. विरोधकांनी संसदेविरोधात आंदोलन करण्यापेक्षा पाकिस्तानविरोधात आंदोलन करावे असे म्हटले होते. त्यावर काँग्रेसने प्रत्युत्तर दिले होते. तर, आज शुक्रवारी झालेल्या सभेत ममता बॅनर्जी यांनी आता पंतप्रधान मोदींनी केलेल्या टीकेला प्रत्युत्तर दिले आहे.
