जळगाव, (प्रतिनिधी)- माजी मंत्री राष्ट्रवादीचे नेते एकनाथराव खडसे यांनी काल देवेंद्र फडणवीस यांना खडे बोल सुनवत जोरदार टीका केली होती या टिकेनंतर माळशिरस विधानसभा मतदारसंघाचे आमदार राम सातपुतेंनी खडसेवर ट्विट करून तोडीपाणी आणि भ्रष्टाचाराचा उल्लेख करून जहरी टीका केली आहे,त्यावर खडसे यांच्या कन्या जिल्हा सहकारी बँकेच्या चेअरमन रोहिणी खडसे आक्रमक होतं, तेव्हा काय तुम्ही नागपुरी बांगड्या भरल्या होत्या का? असा पलटवार करत जोरदार उत्तर दिलं आहे.
दरम्यान एकनाथराव खडसे यांनी काल फडणवीस यांच्यावर टीका करतांना म्हणाले होते की,मी देखील विरोधी पक्षनेता होतो, पण संकटाच्या काळात कधीही असला खेळ खेळला नाही.
देवेंद्र फडणवीस जे करत आहेत, ते विरोधी पक्षनेत्याकडून अपेक्षित नाही.सत्ता गेल्यापासून फडणवीस ‘माशा’ सारखे तडफडत आहे असं म्हणत खडसेनीं टीका केली होती.
भाजपा आमदार राम सातपुते काय म्हणाले….
नाथाभाऊ आपण आयुष्यभर पैसे खायचे सोडून दुसरं काहीच केलं नाही आणि देवेंद्र भाऊ बद्दल बोलत आहात.
विरोधी पक्षनेता असताना तोडपाणी आणि मंत्री झाले तेव्हा भ्रष्टाचार.निष्कलंक देवेंद्रजीवर बोलण्या अगोदर आरसा बघा सगळं लक्षात येईल. असं ट्विट करून टीका केली आहे.
आमदार राम सातपुतेंचा रोहिणी खडसेनीं घेतला समाचार…
भाजपा आमदार राम सातपुते यांच्या ट्विटर टिकेनंतर खडसे यांच्या कन्या रोहिणी खडसे यांनी आक्रमक होतं सातपुतेंचा चांगलाच समाचार घेतला. रोहिणी खडसेनीं ट्विट करून म्हटलं की आमदार जर पैसे खात होते तर मग सत्ता होती तेव्हा कारवाई का केली नाही ? तेव्हा काय तुम्ही नागपुरी बांगड्या भरल्या होत्या का?आणी असेल तुमच्यात हिंमत तर सिद्ध करा ना ? शामराव फडणविशी मिरची तुम्हाला का झोँबली? ज्यांचे बद्दल बोलले त्यांच्या तोंडात काय मिठाची गुळणी आहे का म्हणून ते गप्प आहेत ? असं म्हणत जोरदार जाब विचारला आहे.
