जळगाव प्रतिनिधी | जळगाव जिल्हा मध्यवर्ती सहकारी बँक अर्थात जेडीसीसी बँक निवडणुकीच्या मतदानास आज सकाळी 8 वाजेपासून प्रारंभ झाला आहे. या निवडणुकीत २१ जागांपैकी ११ जागा बिनविरोध झाल्या आहेत. साेसायटी मतदारसंघातील चारपैकी यावल आणि भुसावळ या मतदारसंघात काट्याची लढत आहे. इतर राखीव सहा मतदारसंघातून दिग्गज उमेदवार निवडणुकीच्या रिंगणात आहेत.
जिल्हा बँकेच्या २१ पैकी ११ जागा बिनविराेध निवडून आलेल्या असून, १० जागांसाठी रविवारी मतदान हाेईल. त्यातही काही उमेदवारांनी राजकीय तडजाेडीतून प्रतिस्पर्धी उमेदवारांचा पाठिंबा मिळवला आहे. त्यामुळे चाेपडा, रावेरसारख्या मतदारसंघातील लढतीची उत्सुकता लढतीपूर्वीच संपली आहे. यावल साेसायटी मतदारसंघात भाजपचे गणेश नेहेते, काँग्रेसचे विनाेदकुमार पाटील आणि प्रशांत चाैधरी हे निवडणूक रिंगणात आहेत. भुसावळात भाजपचे आमदार संजय सावकारे आणि शांताराम धनगर यांच्यात सरळ लढत आहे. राखीव मतदारसंघातून राजकारणातील दिग्गज नेते निवडणूक लढवत आहेत. जिल्हाभरातून २८५३ मतदारांच्या हाती या उमेदवारांचे भवितव्य आहे. राजकीय नेतृत्वाच्या दृष्टीने महाविकास आघाडीचे पारडे जड असले तरी मतदारांचा काैल काेणाच्या दिशेने याबाबत राजकीय धास्ती कायम आहे. रविवारी दुपारी ४ वाजेपर्यंत मतदान हाेईल. साेमवारी सकाळी ८ वाजेपासून गणेश काॅलनीतील बँकेच्या सभागृहात मतमाेजणी हाेणार आहे.
या निवडणुकीत महाविकास आघाडीच्या सहकार पॅनलला शेतकरी विकास पॅनलने आव्हान दिली आहे. सहकार पॅनलमध्ये माजी मंत्री डॉ. सतीश पाटील, माजी मंत्री गुलाबराव देवकर, जिल्हा बँकेच्या अध्यक्षा ऍड. रोहिणी खडसे-खेवलकर, शैलजा निकम आदी उमेदवार निवडणुकीच्या रिंगणात आहेत. तर शेतकरी विकास पॅनलतर्फे जिल्हा परिषदेचे शिक्षण समिती सभापती रवींद्र पाटील, कॉंग्रेसचे माजी प्रदेश सरचिटणीस डी. जी. पाटील यांच्या पत्नी अरुणा पाटील, राष्ट्रवादी कॉंग्रेसचे जिल्हा समन्वयक विकास पवार हे रिंगणात आहेत.
