मुक्ताईनगर : जळगाव जिल्हा दूध संघाची निवडणूक अत्यंत चुरशीची होताना दिसून येतेय. कारण राष्ट्रवादीचे नेते एकनाथ खडसे यांनी दूध संघ आपल्या ताब्यात राहावा म्हणून जीवाचे रान सुरू केले आहे. तर या निवडणुकीत खडसे समर्थकांचा करेक्ट कार्यक्रम करण्यासाठी भाजप नेते गिरीश महाजन यांनी आपला डाव मांडला आहे.
या खेळीचाच एक भाग म्हणून खडसे यांच्या स्नुषा, भाजपच्या खासदार रक्षा खडसे यांनाही प्रचाराच्या मैदानात उतरवले आहे. त्यामुळे रक्षा खडसे या निवडणूक प्रचाराच्या मैदानात उतरून सासऱ्याच्या सत्तेला सुरुंग लावणार का? याकडेही सर्वांचं लक्ष लागलं आहे.
मुक्ताईनगर येथे दूध संघाच्या निवडणुकीच्या प्रचारासाठी पद्मश्री लोन येथे शेतकरी विकास पॅनलच्या मतदारांचा मेळावा घेण्यात आला. यावेळी रक्षा खडसे यांनी जोरदार भाषण करून मतदारांचं लक्ष वेधलं. जळगाव जिल्हा दूध संघ सहकार क्षेत्रातील निवडणूक शेतकऱ्यांसाठी अत्यंत महत्त्वाची आहे. मला सहकार क्षेत्राचा अनुभव कमी असल्याने मला त्या संदर्भात जास्त सांगता येणार नाही. पण दूध संघाच्या माध्यमातून शेतकऱ्यांना कसे पुढे नेता येईल याचा प्रयत्न सर्वजण करत आहेत, असं रक्षा खडसे म्हणाल्या.
शेतकऱ्यांना मजबूत करायचं असेल तर एक चांगलं व्यवस्थापन जिल्हा दूध संघावर देण्याची गरज आहे. शेतकरी विकास पॅनलला जास्तीत जास्त मतांनी निवडून द्या, असं आवाहनही त्यांनी केलं.
