जळगाव जिल्हा दूध संघाच्या निवडणुकीबाबत सर्वात मोठी बातमी, या तारखेपर्यंत निवडणूक स्थगित?

जळगाव : जळगाव जिल्हा सहकारी दूध संघाच्या निवडणुकीच्या पार्श्वभूमीवर जिल्ह्यातील राजकारण चांगलंच तापलं आहे. येत्या 10 डिसेंबरला होणाऱ्या या जिल्हा सहकारी दूध संघाच्या निवडणुकीकडे संपूर्ण राज्याचं लक्ष वेधलं गेलं असताना ही निवडणूक आता पुढे ढकलण्यात आलीय.

सूत्रांकडून मिळालेल्या माहितीनुसार, जळगाव जिल्हा दूध संघाची 10 डिसेंबर रोजी होणारी निवडणूक 20 डिसेंबरपर्यंत स्थगित करण्यात आलीय. यामागे काही महत्त्वाची कारणे आहेत.

राज्यात होऊ घातलेल्या 7 हजार 751 ग्रामपंचायतच्या निवडणूक कार्यक्रमामुळे ‘अ’ आणि ‘ब’ दर्जाच्या सहकारी संस्थांच्या निवडणुका या 20 डिसेंबरपर्यंत स्थगित करण्याचा निर्णय घेण्यात आला आहे. सहकार पणन व वस्त्रोद्योग विभागचे सहनिबंधक श्रीकृष्ण वाडेकर यांनी याबाबत आदेश काढले आहेत. त्यांच्या आदेशानुसार आता 20 डिसेंबरनंतर निवडणुकीची पुढील तारीख जाहीर होईल.

दरम्यान, दूध संघाच्या निवडणुका पुढे ढकलण्यात आल्यामुळे आता उमेदवारांना पुढील निवडणूक तारीख जाहीर होण्याची वाट पाहावी लागणार आहे.