चाळीसगाव : तालुक्यातील पोहोरे गावातील एका शेतकऱ्याच्या घराला गॅस लीक झाल्यामुळे लागलेल्या आगीत तब्बल साडेसात लाख रुपयांची रोकड जळून खाक झाली आहे. या प्रकरणी मेहुणबारे पोलीस ठाण्यात अकस्मात आगीची नोंद करण्यात आली आहे. कापूस विकून आलेले रोख पैसे आगीत जळाल्याने पीडित कुटुंबावर दुहेरी संकट कोसळले आहे.
पोहोरे गावातील शेतकरी केशव राघव महाजन यांची पत्नी घरी गॅसवर डाळ शिजवत असताना अचानकपणे गॅस सिलेंडरच्या रेग्युलेटरमधून गॅस गळती होऊन आग लागली. या आगीत महाजन यांनी पत्र्याच्या पेटीमध्ये ठेवलेले ७ लाख ७० हजार रुपये व अल्युमिनियमच्या डब्यांमध्ये ठेवलेले सोन्याचे दागिने आगीत खाक झाले. तसेच संसार उपयोगी वस्तू, कपडे, भांडी व घरावरील लाकडाचा बीम संपूर्ण जळून खाक झाला. गावकरी व अग्निशमन विभागाचे कर्मचारी यांनी एकत्रित केलेल्या प्रयत्नातून आग आटोक्यात आणली
शेतकर्याला अश्रू अनावर
एवढ्या कष्टाने मेहनतीने कापूस पिकवला. दोन पैसे जास्त मिळतील या आशेने दोन दिवसांपूर्वी कापूस विकला आणि नियतीने असा घाला घातला असे म्हणत केशव महाजन यांनी गावकऱ्यांसमोर हंबरडा फोडला. पोलिसांनाही हे दृश्य पाहावलं नाही. मेहुणबारे पोलिस ठाण्याचे पीएसआय योगेश ढिकले यांनी स्वत:च्या खिशातून पाच हजार रुपये तसेच पीएसआय अनिल शंकर यांनी ५ हजार १०० रुपये व पोलीस कॉन्स्टेबल मथुरे यांनी २ हजार रुपयांची मदत महाजन यांना दिली.
शासनाकडून मदत मिळण्याची मागणी
केशवराव महाजन यांच्या मालकीचे स्वतःचे घर नसून ते आधार दगा माळी यांच्या घरात भाडेकरू म्हणून राहत आहेत. या आगीत कमीत कमी २० लाख रुपये नुकसान झालेले असून कोणत्याही प्रकारची जीवितहानी झालेली नाही. पुढील तपास पोलीस करीत आहेत. दरम्यान आगीमध्ये होत्याचे नव्हते झाले, म्हणून केशव महाजन यांना तातडीने शासनाकडून मदत मिळावी अशी मागणी ग्रामस्थांकडून होत आहे.
