मुंबई- विधानसभा निवडणुकीच्या तोंडावरच शिखर बँक घोटाळा प्रकरणी राष्ट्रवादी काँग्रेसचे सर्वेसर्वा शरद पवार आणि अजित पवार यांच्यासह जवळपास 70 जणांवर ईडीनं गुन्हे दाखल केले आहेत. त्यावर अजित पवार यांनी आपली बाजू मांडली आहे. बँकेत 25 हजार कोटी रुपयांचा घोटाळा झाला असेल किंवा अनियमितता झाली असेल तर, बँक अडीचशे ते तीनशे कोटींचा नफा कशी कमावते, असा प्रश्न त्यांनी उपस्थित केला आहे.
महाराष्ट्र राज्य सहकारी बँकेत (एमएससी बँक) कर्ज वितरण करताना 25 हजार कोटी रुपयांचा घोटाळा केल्याच्या आरोपांखाली राष्ट्रवादी काँग्रेसचे अध्यक्ष शरद पवार, माजी उपमुख्यमंत्री अजित पवार, दिलीप देशमुख, ईश्वरलाल जैन, जयंत पाटील, शिवाजीराव नलावडे, शिवसेनेचे आनंदराव अडसूळ, राजेंद्र शिंगणे, मदन पाटील, महाराष्ट्र राज्य सहकारी बँकेच्या अध्यक्षांसह 70 जणांवर सक्तवसुली संचालनालयाने (ईडी) मंगळवारी गुन्हा दाखल केला. या सर्वांवर पैशांची अफरातफर केल्याचा ठपका ठेवण्यात आला आहे. विधानसभा निवडणुकीच्या तोंडावर हा गुन्हा दाखल झाल्याने शरद पवार आणि राष्ट्रवादीच्या नेत्यांच्या अडचणी वाढल्या आहेत, असं बोललं जातं. शरद पवार आणि इतर राजकीय नेत्यांना आर्थिक गुन्हे शाखेबरोबरच ईडीच्या चौकशीलाही सामोरे जावे लागणार आहे. त्यामुळे ईडीचा पुढील तपास कसा असेल, आरोपींना चौकशीसाठी ताब्यात घेतले जाणार का, याकडे सगळ्यांचे लक्ष लागले असतानाच, या प्रकरणी अजित पवार यांनी एका वृत्तवाहिनीशी बोलताना आपली बाजू स्पष्ट केली आहे.
शिखर बँक प्रकरणाशी शरद पवार यांचा काहीही संबंध नाही. ते कोणत्याही पदावर नसताना त्यांचं नाव यात आलं कसं हे समजू शकलं नाही. बारा ते तेरा हजार कोटींच्या ठेवी बँकेत असताना 25 हजार कोटी रुपयांचा घोटाळा होईल कसा? असा प्रश्न पवार यांनी उपस्थित केला. अनियमितता झाली असेल किंवा बँकेला अडचणीत आणणारे निर्णय घेतले गेले असतील तर ते तपासावे. 25 हजार कोटींचा घोटाळा झाला असेल तर आजच्या घडीला ही बँक 250 ते 300 कोटी रुपयांचा नफा कशी कमावते. बँकेत घोटाळा झाला असता तर आतापर्यंत टाळं लावावं लागलं असतं, असंही ते म्हणाले. विविध यंत्रणांना चौकशी करण्याचा अधिकार आहे. मला कुणावरही राजकीय आरोप करायचा नाही. पण ज्यांच्यावर आरोप आहेत त्यांना किमान बाजू मांडण्याची संधी तर द्यायला हवी ना, असा सवालही त्यांनी केला.
