झारखंड : झारखंडमधील पाकूर जिल्ह्यात आज बुधवारी सकाळी एक मोठा भीषण अपघात झाला. बस आणि ट्रक यांच्यात झालेल्या भीषण अपघातात 15 जण ठार झाले. या अपघातात अनेक जण जखमी झाल्याची माहिती आहे.
आम्रपाडा पोलीस ठाण्याच्या हद्दीतील पडेर कोला गावाजवळ हा अपघात झाला. प्रवाशांनी भरलेली बस आणि ट्रकची थेट धडक झाली. ट्रक गॅस सिलिंडरने भरलेला होता. पोलिसांनी दिलेल्या माहितीनुसार, लिट्टीपारा-आम्रापाडा मुख्य रस्त्यावर पडेर कोलाजवळ एक खाजगी बस आणि सिलेंडरने भरलेल्या ट्रकची समोरून धडक झाली. अनियंत्रित ट्रक बसवर आदळला. ही धडक इतकी जोरदार होती की दोन्ही वाहनांचे मोठे नुकसान झाले. मृतांमध्ये बहुतांश बसस्वार होते. मोठा आवाज ऐकून आजूबाजूच्या लोकांनी घटनास्थळ गाठून पोलिसांना माहिती दिली.
या अपघातात 15 जणांचा मृत्यू झाल्याची प्राथमिक माहिती आहे. मृतांचा आकडा वाढू शकतो. जखमींपैकी काहींची प्रकृती चिंताजनक आहे. अपघातग्रस्त प्रवाशांची माहिती अद्याप उपलब्ध झालेली नाही. माहिती मिळताच पोलिस आणि प्रशासनाचे पथक घटनास्थळी पोहोचले आणि स्थानिक लोकांच्या मदतीने मदत आणि बचाव कार्य सुरू केले. अपघातातील मृतांची ओळख पटवण्याचे प्रयत्न सुरू आहेत.
टक्कर अशी होती की मृतदेह रस्त्यावर पडले होते
बस साहिबगंजहून दुमकाकडे जात होती. पाकूरचे एसपी एचपी जनार्दन यांनी सांगितले की, आतापर्यंत 15 मृतदेह बाहेर काढण्यात आले आहेत. बसमधील लोकांना बाहेर काढण्याचे काम सुरू आहे. ही धडक एवढी जोरदार होती की दोन्ही गाड्यांचा चक्काचूर झाला. बसमधून अनेक लोक मृत किंवा जखमी अवस्थेत रस्त्यावर पडले, तर बरेच लोक आत अडकले. जखमी आणि मृतांना बसमधून बाहेर काढण्यासाठी खूप प्रयत्न करावे लागले.
