पुणे – अब्राहम लिंकनच्या मारेकर्याचे पुतळे अमेरिकेत उभारले जात नाहीत. भारतात नथुरामचे पुतळे उभारले जातात, मृत्यूदिनी अभिवादन केले जाते. प्रज्ञासिंग ठाकूर नथुरामचे समर्थन करून खासदार होते. गांधी विचार संपविणारे सत्तेत जातात, हा गांधीजींचा नव्हे, तर भारतीय म्हणून आपल्या सर्वांचा पराभव आहे,’ अशी टीका ज्येष्ठ पत्रकार खासदार कुमार केतकर यांनी मंगळवारी केली. ’जसा विचार मांडला, तसाच गांधीजींचा आचार होता; म्हणून वेगळा प्रचार त्यांना करावा लागला नाही,’ असा टोला त्यांनी पंतप्रधान नरेंद्र मोदी यांना उद्देशून लगावला.
महाराष्ट्र गांधी स्मारक निधीतर्फे आयोजित ’राष्ट्रपिता महात्मा गांधी सप्ताहा’चे उद्घाटन कुमार केतकर यांच्या हस्ते झाले. त्या वेळी ते बोलत होते. संस्थेचे अध्यक्ष डॉ. कुमार सप्तर्षी, सचिव अन्वर राजन; तसेच मोहन छाजेड, जांबुवंत मनोहर, तुषार झरेकर, अप्पा अनारसे उपस्थित होते.
’नेल्सन मंडेला, मार्टिन ल्युथर किंग, गोर्बाचेव्ह ते बराक ओबामा या सर्व जागतिक नेत्यांना गांधीजींची प्रेरणा होती. सेंद्रिय शेती, रासायनिक मुक्त अन्न, अण्वस्त्र मुक्त जग हे विचार गांधीजींनी मांडले आहेत. गांधींचा वारसा सर्वाधिक शुद्ध, भव्य आणि मानवतावादी आहे आणि तोच पुढे नेला पाहिजे,’ असे सांगून ’गांधीजी नसते, तर आपल्याला इतका मोठा वैचारिक वारसा कोणी दिला असता,’ असा सवाल केतकर यांनी केला. ’बहुमत असले, तरी संविधान बदलता येणार नाही, असे गांधी विचारांच्या आधारे आपल्याला सांगता आले पाहिजे,’ असे सप्तर्षी यांनी ठणकावले.
शरद जोशी, मौलाना इसहाक, ग्यानी अमरजित सिंह, मृणालिनी छाजेड, भंते सुदर्शन, नोएल माजगावकर यांनी सर्वधर्मीय प्रार्थना सादर केली. ज्येष्ठ गांधीवादी कार्यकर्त्या वासंती सौर यांनी कस्तुरबा गांधींवर लिहिलेल्या पुस्तकाचे प्रकाशन झाले. नागपूर ते पुणे सायकल यात्रेतील सहभागी व्यक्तींचा सत्कार करण्यात आला. गांधीजींच्या जीवनकार्यावरील छायाचित्रांचे प्रदर्शन ’दक्षिणायन’चे समन्वयक संदेश भंडारे यांच्या हस्ते झाले. संदीप बर्वे यांनी सूत्रसंचालन केले. दहावे वर्ष असलेल्या महोत्सवात 7 ऑक्टोबरपर्यंत विविध कार्यक्रम होणार आहेत.
