मुंबई : भोसरी येथील जमीन खरेदी प्रकरणी राष्ट्रवादी काँग्रेसचे नेते एकनाथ खडसे यांच्या अडचणीत वाढ झाली आहे. एकनाथ खडसे यांच्याविरोधात ईडीने (सक्तवसुली संचलनालय) एक हजार पानांचे आरोपपत्र दाखल केलं आहे. त्यांच्या पत्नी मंदाकिनी खडसे आणि जावई गिरीश चौधरी यांच्यासह तीन कंपन्यांचाही आरोपी म्हणून समावेश आहे.
भोसरी एमआयडीसीच्या भूखंडाचे बाजार मूल्य ३१ कोटी असताना खडसे व त्यांच्या जावयाने हा भूखंड ३.७५ कोटी रुपयांना खरेदी केला. वादग्रस्त भूखंड चौधरी यांच्या नावे खरेदी करण्यात आला. मात्र, खरेदीचे पैसे पाच बनावट कंपन्यांद्वारे देण्यात आले. खडसे आणि चौधरी यांच्या यामधील भूमिकेचा तपास ईडी करत होती.
ईडीच्या म्हणण्यानुसार, भूखंड खरेदीसाठी काही कंपन्यांकडून कर्ज घेतल्याचा दावा चौधरी यांनी केला आहे. याबाबत तपास केला असता, हा निधी पाच बनावट कंपन्यांकडून आल्याचे उघडकीस आले.
गेल्यावर्षी ऑक्टोबर महिन्यात ईडीने एकनाथ खडसे, मंदाकिनी खडसे, गिरीश चौधरी, अब्बास उकानी यांच्याविरोधात ईसीआयआर दाखल केला. उकानी हा भूखंडाचा मूळ मालक आहे. ईडीच्या म्हणण्यानुसार, तत्कालीन महसूल मंत्री खडसे यांनी आपल्या पदाचा गैरवापर करत सरकारी यंत्रणांचा गैरवापर केला. त्यांनी भूखंडाची मूळ किंमत कमी करून भूखंड कमी दरात खरेदी केल्याचा ‘ईडी’चा आरोप आहे.शुक्रवारी ‘ईडी’ने याप्रकरणी आरोपपत्र दाखल के ले. त्यात चौधरी यांच्यासह खडसे, त्यांची पत्नीलाही आरोपीपत्र दाखल केले आहे.
गेल्या महिन्यात ईडीने खडसे, मंदाकिनी खडसे आणि चौधरी यांनी एकूण ५.७३ कोटी रुपयांची मालमत्ता जप्त केली.
