जम्मूः – दक्षिण काश्मीरमधील शोपियानमध्ये सुरक्षा दल आणि दहशतवादी यांच्यात झालेल्या चकमकीत हिजबुलचे तीन दहशतवादी ठार झाले आहेत. नवीन वर्षातील ही तिसरी चकमक आहे. आज सोमवारी सकाळी सुरक्षा दलाला या परिसरात दहशतवादी लपल्याची माहिती मिळाली होती. यानंतर सुरक्षा दलाने या परिसराला घेराव घातला. घरात लपलेल्या दहशतवाद्यांनी जवानांच्या दिशेने गोळीबार केला. जवानांनी याला जोरदार प्रत्युत्तर दिले. या गोळीबारात तीन दहशतवादी मारले गेले.
सुरक्षा दलाला दहशतवादी लपल्याची माहिती मिळताच जवानांनी या परिसराला घेराव घातला. दहशतवाद्यांना आत्मसमर्पण करण्याची सूचना सुरक्षा दलांनी केली होती. परंतु, दहशतवाद्यांनी जवानांच्या दिशेने लागोपाठ गोळीबार केला. या गोळीबाराला जवानांनी जशास तसे प्रत्युत्तर दिले. जवानांनी केलेल्या गोळीबारात तीन दहशतवादी मारले गेले. मारल्या गेलेल्या दहशतवाद्यामधील एकाची ओळख पटली असून त्याचे नाव आदिल शेख आहे. तो शोपियानचा रहिवासी आहे. जम्मू-काश्मीर पोलीस आणि एसपीओच्या पदावर तो कार्यरत होता. त्यानंतर तो हिजबुल या दहशतवादी संघटनेत सहभागी झाला होता. त्याने २९ सप्टेंबर २०१८ साली जवाहर नगर श्रीनगरमधून पीडीपीचे तत्कालीन आमदार अजाज मीर यांच्या घरातून ८ शस्त्र लुटले होते. दुसऱ्या दहशतवाद्याचे नाव वसीन वानी आहे. हा शोपियानचा रहिवासी होता. तर तिसरा दहशतवादी हा जहांगीर मलिक आहे. तो पुलवामा जिल्ह्यातील अचेन परिसरात राहणारा आहे.
याआधी १२ जानेवारी रोजी पुलवामामधील त्राल मध्ये लष्कराने केलेल्या कारवाईत तीन दहशतवाद्यांना मारले होते. मारण्यात आलेल्या दहशतवाद्यामध्ये हिजबुलचा कमांडर हमाद खानचा समावेश होता. हमाद खानकडे काश्मीरमध्ये दहशतवाद पसरवण्याची जबाबदारी होती. तसेच तो नवीन कमांडर बनला होता. हमाद हा त्रालचा रहिवासी होता.
