चाळीसगाव । कन्नड (औट्रम) घाटात होणाऱ्या वाहतूक कोंडीबाबतच्या दाखल जनहित याचिकेवर औरंगाबाद खंडपीठात सुनावणी पार पडली असून यादरम्यान, न्यायालायने कन्नड-चाळीसगाव दरम्यानचा औट्रमघाट (कन्नड घाट) हा 11 ऑगस्टपासून काही अपवाद वगळता जड वाहतुकीसाठी पूर्णत: बंद करण्याचे आदेश मुंबई उच्च न्यायालयाच्या औरंगाबाद खंडपीठाचे न्या. रवींद्र घुगे आणि न्या. वाय. जी. खोब्रागडे यांनी दिले. या वाहनांसाठी पर्यायी मार्गही खंडपीठाने सुचविला आहे. त्यामुळे आता औट्रमघाटातील वाहतूक कोंडीचा मार्ग मोकळा होण्याची शक्यता आहे. न्यायालयाच्या या निर्णयानंतर वाहनधारकांना मोठा दिलासा मिळाला आहे.
गौताळा अभयारण्यातून वाहतुकीचा राष्ट्रीय महामार्ग प्राधिकरणाच्या वतीने ॲड. सुहास उरगुंडेंनी दिलेला प्रस्ताव कोर्टाने नाकारला. आधीच वन्यप्राणी कमी होत आहेत. त्यांचे रक्षण गरजेचे असल्याने कुठल्याही स्थितीत हा पर्यायी मार्ग काढता येणार नाही, असे खंडपीठाने निक्षून सांगितले.
कन्नड (औट्रम) घाटात होणाऱ्या वाहतूक कोंडीबाबतची जनहित याचिका ॲड. ज्ञानेश्वर बागूल, ॲड. श्रीकृष्ण चौधरी व ॲड. नीलेश देसले यांनी दाखल केली होती. यावर शुक्रवारी औरंगाबाद खंडपीठात सुनावणी पार पडली. तर यावेळी औट्रमघाट (कन्नड घाट) हा 11 ऑगस्टपासून काही अपवाद वगळता जड वाहतुकीसाठी पूर्णत: बंद करण्याचे आदेश न्यायालायने दिली.
या वाहनांना असेल घाटातून बंदी
जड वाहने, मल्टीएक्सल व्हेइकल, हेवी ट्रक, पेट्रोल, डिझेल, एलपीजी वाहून नेणारे टँकर, लक्झरी खासगी बस आदींना बंदी घातली. सैन्य दलासह निमलष्करी दलाची वाहतूक करणाऱ्या वाहनांना प्रवेश द्यावा, अशी विनंती मुख्य सरकारी वकील ज्ञानेश्वर काळे यांनी केली. पण सैन्य दलाच्या जवानांसह केवळ वाहतूक करणाऱ्या वाहनांना प्रवेश बंदी राहील. केवळ आणीबाणीची परिस्थिती असेल तरच परवानगी घेऊन सैन्य, निमलष्करी दल, पोलिस दल आदींची वाहने घाटातून जाऊ शकतील, असे खंडपीठाने स्पष्ट केले.
या वाहनांना असेल घाटातून प्रवेश
शेतकऱ्यांच्या गाड्या, दुचाकी, चारचाकी, सर्व राज्य मंडळाच्या प्रवासी बस, रुग्णवाहिका, घाटात गाडी अडकल्यास काढण्यासाठी क्रेन, फायर ब्रिगेडची वाहने, हलकी वाहने आदींना वाहतुकीस परवानगी दिली आहे. यावर जळगाव आणि छत्रपती संभाजीनगरचे उपविभागीय परिवहन अधिकारी, दोन्ही जिल्ह्यांचे पोलिस अधीक्षक आदींना अंमलबजावणीचे आदेश दिले आहेत.
