मुंबई-विधानसभेसाठी महायुती होणार की नाही याबरोबरच युवासेना प्रमुख आदित्य ठाकरे हे निवडणूक लढवणार की नाहीत, याविषयी गेल्या काही दिवसांपासून जोरदार चर्चा सुरू होती. मात्र, महायुतीसह आदित्य यांच्या निवडणूक लढवण्यावरही सोमवारी शिक्कामोर्तब झाले. ’वरळी मतदारसंघातून मी विधानसभा निवडणूक लढवणार आहे’, असे खुद्द आदित्य यांनीच जाहीर केले. त्यामुळे निवडणुकीच्या मैदानात उतरणारे आदित्य हे ’ठाकरे’ कुटुंबातील पहिली व्यक्ती ठरले आहेत.
’आमदार, मुख्यमंत्री बनण्यासाठी किंवा माझे स्वप्न साकार करण्यासाठी नव्हे, तर महाराष्ट्रातील जनतेचे स्वप्न साकार करण्यासाठी, नवा महाराष्ट्र घडविण्यासाठी मी राजकारणात प्रवेश करतोय. त्यासाठीच तुम्हा सर्व शिवसैनिकांच्या साक्षीने वरळी मतदारसंघातून आगामी विधानसभा निवडणूक लढविणार आहे’, अशी घोषणा आदित्य यांनी केली. वरळीत लाला लजपतराय कॉलेजात शिवसेनेचा संकल्प मेळावा आयोजित करण्यात आला होता. या मेळाव्याला संबोधित करताना आदित्य ठाकरे यांनी वरळीतून त्यांची उमेदवारी घोषित केली. यावेळी रश्मी ठाकरे आणि तेजस ठाकरेही उपस्थित होते. आदित्य यांनी त्यांची उमेदवारी जाहीर करताच शिवसैनिकांनी ’जय शिवाजी, जय भवानी’ आणि ’आदित्य ठाकरे आगे बढो, हम तुम्हारे साथ है’ च्या घोषणा दिल्या. विद्यमान आमदार सुनील शिंदे यांनी पुष्पगुच्छ देऊन आदित्य यांचे अभिनंदन केले. राजकारणाशिवाय मी काहीही करू शकत नाही. पण, तुमची परवानगी असेल तर शिवरायांच्या आणि सर्व महापुरुषांच्या साक्षीने निवडणूक लढवणार असल्याचे आदित्य यांनी सांगितले.
’वरळीला जागतिक पातळीवर नेणार-
’वरळीला जागतिक पातळीवर न्यायचे आहे. राजकारणात असल्यास एका निर्णयामुळे तुम्ही लाखो लोकांचे भविष्य घडवू शकता. त्यामुळेच मी निवडणुकीला उभा राहतोय’, असे आदित्य म्हणले. पक्षप्रमुख उद्धव ठाकरे यांची परवानगी असल्यानेच निवडणूक लढवत असल्याचेही त्यांनी स्पष्ट केले.
निवडणुकीदरम्यान माझा प्रचार कराच, पण प्रतिस्पर्धी उमेदवारालाही त्याचा प्रचार करू द्या, असे आवाहन यावेळी आदित्य यांनी शिवसैनिकांना केले. ’सध्या हीच निवडणूक लढवण्याची नेमकी वेळ आहे. महाराष्ट्र कर्जमुक्त करण्याची, प्रदूषणमुक्त करण्याची, बेरोजगारीमुक्त करण्याची हीच ती वेळ आहे. म्हणूनच मी निवडणूक लढवण्याचा निर्णय घेतला असून, माझ्यासाठी हा ऐतिहासिक क्षण आहे. मी बिनधास्त झेप घेत आहे’, असेही ते म्हणाले. 80 टक्के समाजकारण आणि 20 टक्के राजकारण करणार असल्याचेही त्यांनी यावेळी सांगितले.
आदित्य झाले भावूक- जनआशीर्वाद यात्रेनंतर सगळीकडे 40 मिनिटांपेक्षाही जास्त भाषण करण्याची मला सवय झाली. मात्र, आज मला काय बोलायचे ते सुचत नाहीये. म्हणूनच मी आईला मुद्दामहून स्टेजवर बसायला सांगितले. हे सांगताना काही क्षण थांबलेले आदित्य भावूक झालेले दिसले. स्टेजवर बसलेल्या रश्मी ठाकरे या देखील भावूक झालेल्या पहायला मिळाल्या.
