जळगाव : आजारी वडिलांची भेट घेऊन परतणाऱ्या मयूर अरुण चौधरी या तरुणाच्या दुचाकीला अज्ञात वाहनाने धडक दिली. त्यात मयूर याचा जागीच मृत्यू झाल्याची घटना रात्री महामार्गावरील सिमेंट कंपनीजवळ घडली. ऐन दिवाळीत तरुणाचा अपघाती मृत्यू झाल्याने परिसरात हळहळ व्यक्त होत आहे.
सविस्तर असे की, मयूर चौधरी हा भुसावळ तालुक्यातील शिवपूर कन्हाळा येथील रहिवाशी आहे. तो मयूर रेमंड वस्त्रोद्योग कंपनीत कामाला होता. नोकरीच्या निमित्ताने मयूर हा आई-भावासह दोन वर्षांपूर्वी नशिराबाद येथे स्थलांतरित झाला आहे.
त्याचे वडील अरुण अमृत चौधरी वृद्धापकाळाने सतत आजारी असतात. ते शिवपूर-कन्हाळा येथे राहतात. सोमवारी सुटी टाकून मयूर वडिलांची भेट घेण्यासाठी दुचाकीने (एमएच १९ डीजी ५५७५) मूळगावी गेला होता. वडिलांची भेट घेतल्यावर रात्री घराकडे पतत असताना आठ वाजेच्या सुमारास भुसावळ-जळगाव राेडवरील ओरिएंट सिमेंट कंपनीसमाेर त्याच्या दुचाकीला अज्ञात वाहनाने धडक दिली. अपघातात त्याचा जागीच मृत्यू झाला. एमआयडीसी पोलिसांनी पंचनामा केला.
