अमळनेर – पाऊस ओसरल्यानंतर हाती आलेले धान्य विकून चार पैसे हातात पडावेत या उद्देशाने तालुक्यातील शेतकऱ्यांची पावले अमळनेर बाजार समितीकडे वळली आहेत. विशेषत: सोमवारपासून बाजार समितीच्या आवारात मक्याची आवक वाढली आहे. गेल्या चार वर्षात वाढलेली आवक पाहता भाव देखील स्थिर आहेत.
यंदाच्या हंगामात तालुक्यात मक्याचे क्षेत्र लक्षणीय वाढले होते. चांगला पाऊस असल्यास कोरडवाहू जमिनीत देखील मक्याचे चांगले उत्पादन येते, यामुळे अनेक शेतकऱ्यांनी मका लागवडीस प्राधान्य दिले होते. दरम्यान, अवकाळी पावसामुळे मक्याचे मोठे नुकसान झाले. आता हाती आलेला मका विक्रीसाठी शेतकऱ्यांची लगबग सुरू आहे. यामुळे अमळनेर बाजार समितीमधील मक्याची आवक वाढली आहे. हे चित्र पाहता अजून काही दिवस भाव स्थिर राहण्याचे अंदाज आहे. मात्र, कोरडा आणि चांगल्या प्रतीचा मका विक्रीस आल्यास भाव अजून वधारातील, असा अंदाज बाजार समिती सचिव उन्मेशकुमार राठोड यांनी व्यक्त केला. केवळ मकाच नव्हे, तर अमळनेर बाजार समितीत ज्वारी, बाजरीची देखील खरेदी-विक्री सुरू झाली आहे. पुढील आठवड्यात ही आवक वाढेल, असा अंदाज आहे. गेल्या गुरुवारी ज्वारीची आवक १९३० क्विंटल होती.
अमळनेर बाजार समितीत तालुक्यासह शेजारील शिंदखेडा, चोपड्यातील चहार्डी, अनवर्दे, धरणगाव, पारोळा या भागातून धान्य विक्रीसाठी येते. येथे खरेदी केलेला मका रेल्वेद्वारे मका परराज्यात पाठवला जातो. त्यातून कोट्यवधींची उलाढाल होते. तूर्त बाजार समितीत रोज ७ ते ८ हजार क्विंटल धान्य विक्रीस येत आहे. गुरुवारी तब्बल ७ हजार ३९० क्विंटल धान्य आले. यात मक्याला कमाल १९६५ ते ९०० रुपये भाव मिळाला.
