पोलीस उपअधीक्षकांची कारवाई : चौघांना घेतले ताब्यात
जळगाव;- शहरातील जयकिसनवाडी परिसरात शिवतीर्थ मैदानासमोर एका घरात अनधिकृत शेअर मार्केटचा प्रकार सुरू असल्याची खळबळजनक बाब समोर आली आहे.
मंगळवारी सायंकाळी ६ वाजेच्या सुमारास पोलीस उपअधीक्षक डॉ.नीलाभ रोहन यांना याबाबत माहिती मिळताच त्यांनी थेट घर गाठले. लक्ष्मण निवास घराच्या पहिल्या माळ्यावर हा प्रकार सुरू होता. डॉ.रोहन यांनी तात्काळ शहर पोलीस ठाण्याचे निरीक्षक आणि सर्व डीबी कर्मचाऱ्यांसह क्यूआरटी पथकाला बोलावून घेतले. सुमारे दीड तास चौकशी केल्यानंतर डॉ.रोहन यांनी चौघांना ताब्यात घेतले असून कॉम्प्युटरचे सिपीयू आणि वाहने जप्त केली आहेत.
ताब्यात घेतलेल्या चौघांची सायबर विभागाचे निरीक्षक अरुण निकम यांच्या पथकाकडुनही चौकशी सुरु होती. पोलिसांनी जप्त केलेल्या संगणक व आयपी अॅड्रेसवरुन काय माहिती मिळू शकते? याची तपासणी केली. याप्रकरणी रात्री गणेश कॉलनीतून एक संशयितही ताब्यात घेतल्याचे पोलिसांनी सांगितले. रात्री उशिरापर्यत घटनेची नोंद सुरु होती.
