तेहरान – इराणच्या कुद्स फौजांचे प्रमुख जनरल कासीम सुलेमानी अमेरिकेच्या हवाई हल्ल्यात मारले गेल्यानंतर इराणमध्ये दुःखाची आणि संतापाची लाट आहे. त्याचवेळी इराणच्या संसदेनं अमेरिकी लष्कर आणि पेंटागॉनला दहशतवादी संघटना घोषित करण्याच्या बाजूनं मतदान केलं. इराणच्या सरकारी प्रसारमाध्यमांच्या माहितीनुसार, खासदारांनी सुलेमानी यांच्या हत्येच्या विरोधात हा प्रस्ताव मंजूर केला. दरम्यान,अमेरिकी आणि इराणमधील आघाडीच्या नेत्यांमध्ये सध्या शाब्दिक युद्ध सुरू आहे.
संसदेत अमेरिका-इस्रायलविरोधी घोषणाबाजी
इराणच्या माध्यमांनी दिलेल्या माहितीनुसार, विधेयक मंजूर करण्यापूर्वी अमेरिका आणि इस्रायलचा निषेध करण्यात आला. सुलेमानी यांच्या हत्येचा सूड घेण्याचा आणि अमेरिका-इस्रायलला धडा शिकवण्याचा संकल्प खासदारांनी सोडला. तत्पूर्वी ५ जानेवारी रोजी संसदेत खासदारांनी अमेरिकाविरोधी घोषणाबाजी केली होती. त्याआधी सोमवारी सुलेमानी यांच्या अंत्ययात्रेवेळी लोकांचा हुजूम तेहरानमधील रस्त्यांवर उतरला. हातात निषेधाचे फलक घेऊन लोकांनी अमेरिका आणि इस्रायलच्या विरोधात जोरदार घोषणाबाजी केली.
