मुंबई,(प्रतिनिधी)- राष्ट्रवादी काँग्रेस पक्षातून अजितदादा पवार यांनी वेगळी भूमिका घेत शिंदे – फडणवीस सरकार सोबत जाण्याचा निर्णय घेतल्या नंतर पक्षात फूट पडल्या नंतर पक्षाचे राष्ट्रीय अध्यक्ष शरद पवारांनी संघटनात्मकबांधणी व फेरबदल सुरू केले आहेत. त्याचाच एक भाग म्हणून पक्षाच्या महिला प्रदेशाध्यक्षपदी माजी मंत्री एकनाथ खडसे यांची कन्या रोहिणी खडसे यांची नियुक्ती करण्यात आली आहे. मुंबईत मंगळवारी राष्ट्रवादीची बैठक पार पडली. त्यात पवारांनी रोहिणी खडसेंना नियुक्तीचे पत्र दिले.
रोहिणी खडसे या जळगाव जिल्हा मध्यवर्ती सहकारी बँकेच्या माजी अध्यक्षा आणि विद्यमान संचालिका आहेत. या नियुक्तीनंतर माध्यमांशी बोलताना महाराष्ट्रात महिलांचे संघटन वाढवण्यासाठी मी प्रयत्नशील राहील, असे त्यांनी सांगितले. विद्या चव्हाण नाराज नाहीत. त्यांच्या उपस्थितीत मला नियुक्त्तीचे पत्र देण्यात आले. विद्या चव्हाण यांच्या आशीर्वाद आणि मार्गदर्शनाखालीच मी काम करणार आहे, असेही रोहिणी खडसे म्हणाल्या.
