नाशिक- अजित पवार यांना उपमुख्यमंत्रीपद देण्यास माझा अजिबात विरोध नाही. कोणाला काय द्यायचे हा निर्णय सर्वस्वी आमच्या पक्षाचे अध्यक्ष शरद पवार यांचा आहे,’ असं राष्ट्रवादी काँग्रेसचे नेते व राज्याचे मंत्री छगन भुजबळ यांनी सांगितलं.
राज्यात शिवसेना, राष्ट्रवादी व काँग्रेस आघाडीचं सरकार येऊन आठवडा उलटल्यानंतरही मंत्र्यांचं खातेवाटप झालेलं नाही. उपमुख्यमंत्रिपदाच्या मुद्द्यावरून राष्ट्रवादी काँग्रेसमध्ये मतभेद असल्यानं खातेवाटप रखडलं असल्याची चर्चा आहे. अजित पवार यांना उपमुख्यमंत्रीपद मिळावं म्हणून त्यांचे समर्थक आमदार आग्रही आहेत. तर, पक्षाशी विश्वासघात करणाऱ्या अजितदादांना लगेचच मोठं पद दिल्यास चुकीचा संदेश जाईल, असं पक्षातील काही नेत्याचं मत असल्याचं समजतं.
या संदर्भात छगन भुजबळ यांना विचारलं असता त्यांनी ही चर्चा फेटाळून लावली. ‘अजित पवारांना उपमुख्यमंत्रीपद देण्यास माझा अजिबात विरोध नाही. त्यांना हे पद मिळाल्यास आनंदच आहे. अजितदादा पक्षातून फुटून भाजपला जाऊन मिळाले तेव्हा त्यांची मनधरणी करण्यात व त्यांना पुन्हा पक्षात आणण्यासाठी मी स्वत: प्रयत्न केले होते. त्यामुळं माझा विरोध असण्याचा प्रश्नच उद्भवत नाही. कोणत्या नेत्याला कुठलं पद द्यायचं हा निर्णय आमच्या पक्षाचा व पवारसाहेबांचा आहे,’ असंही त्यांनी स्पष्ट केलं.
