भडगाव | तालुक्यातील आमडदे पहाटे पहाटे एका मोठ्या घटनेने हादरले आहे. वाळूने भरलेले भरधाव ट्रॅक्टर वस्तीमध्ये शिरल्याने एका चिमुकलीचा बळी गेल्याची भयंकर घटना घडलीय.तसेच यात सहा ते सात जण जखमी झाले असून जखमींना उपचारासाठी दवाखान्यात हलविण्यात आले आहे.
याबाबत अधिक असे की, भडगाव तालुक्यातील आमडदे येथे आज पहाटे एक भयंकर घटना घडली. परिसरातून मोठ्या प्रमाणात वाळूची तस्करी होत असते. अशाच प्रकारे वाळूची चोरटी वाहतूक करणारे भरधाव वेगाने जाणारे ट्रॅक्टर हे आमडदे येथील गणपती नगरातल्या वस्तीमध्ये शिरले. या भागात कच्चे बांधकाम केलेले घरे असल्याने ट्रॅक्टरच्या धडकेत ते कोसळले. या दुर्घटनेत एका चिमुकलीचा मृत्यू झाला असून यात तीन-चार घरे उध्वस्त झाली आहेत.
तसेच या घटनेत सहा ते सात जण जखमी झाले आहे. जखमींना तातडीने उपचारासाठी रूग्णालयात पाठविण्यात आले आहे. दरम्यान, या भयंकर घटनेमुळे परिसरातील वाळू तस्करीचा मुद्दा पुन्हा एकदा चर्चेत आला असून आमडदेकरांनी अतिशय संतप्त प्रतिक्रिया व्यक्त केल्या आहेत. शेवटचे वृत्त हाती आले तेव्हा आमडदे येथी दुर्घटना झालेल्या ठिकाणी मोठा जमाव जमला होता.
