नवी दिल्ली: भारतीय जनता पक्षासोबत शिवसेनेचा सत्ता स्थापनेबाबत बोलणी झालेली असताना तशी बोलणी झालीच नाही असे सांगून उद्धव ठाकरे यांना खोटे ठरवण्याचा प्रयत्न झाला. यामुळे राज्याच्या राजकारणात गोंधळ निर्माण होऊन विश्वासार्हतेला तडा गेला. याच कारणामुळे आपण आपल्या मंत्रिपदाचा राजीनामा पंतप्रधान नरेंद्र मोदी यांच्याकडे सोपवला असल्याचे शिवसेनेचे खासदार अरविंद सावंत यांनी जाहीर केले. सावंत यांच्या राजीनाम्यानंतर शिवसेना केंद्रातील एनडीएमधून बाहेस पडल्याचे मानले जात आहे.
सावंत यांनी पत्रकार परिषदेत राजीमाना दिल्याचे जाहीर करताना राजीनामापत्र देखील दाखवले. आपल्याकडे पंतप्रधान मोदी यांनी अवजड उद्योग आणि सार्वजनिक उपक्रम या पदाचा कार्यभार होता. विधानसभा निवडणुकीनंतर उद्धव ठाकरे यांना खोटे ठरवण्याचा प्रयत्न झाला आणि विश्वासार्हतेला तडा गेला असे सावंत म्हणाले.
आज सकाळी राजीनाम्याची केली होती घोषणा
शिवसेनेची बाजू सत्याची आहे. अशा खोट्या वातावरणात दिल्लीतील सरकारमध्ये तरी का राहायचे?, असे ट्विट करत अरविंद सावंत यांनी आपण केंद्रीय मंत्रिपदाचा राजीनामा देत आहोत असे म्हटले होते. आपला निर्णय जाहीर करताना सावंत यांनी भारतीय जनता पक्षावर टीकास्त्रही सोडले होते.
पंतप्रधान नरेंद्र मोदी यांच्याकडे आपला राजीनामा सुपूर्द केल्यानंतर अरविंद सावंत यांनी पत्रकार परिषदेत राजीनामा दिल्याचे सांगितले. लोकसभा निवडणुकीपूर्वी जागा वाटप आणि सत्ता वाटपाचे सूत्र ठरले होते. दोन्ही पक्षांना हे सूत्र मान्य होते. आता हे सूत्रच नाकारून शिवसेनेला खोटे ठरवण्याचा प्रकार धक्कादायक आहे, असे अरविंद सावंत यांनी ट्विटमध्ये म्हटले होते. हा प्रकार महाराष्ट्राच्या स्वाभिमानाला कलंक लावणारा आहे. खोटेपणाचा कळस करत भाजपने महाराष्ट्रात फारकत घेतलीच आहे, अशा शब्दांत भाजपवर टीकास्त्र सोडत अरविंद सावंत यांनी युती तोडल्याचा दोष भारतीय जनता पक्षाला दिला आहे.
