रावेर प्रतिनिधी | रावेरमध्ये एक दुर्दैवी घटना समोर आलीय. अवघ्या २१ दिवसांपूर्वी मोठ्या थाटामाटात विवाह झालेल्या नववधूच्या लग्नाची हळद सुकण्यापूर्वीच तिचा ‘ब्रेन हॅमरेज’ने मृत्यू झाल्याची दुर्दैवी घटना शहरात वाणी गल्लीत घडली. या घटनेमुळे विवाहितेचे कुटुंब पुरते हादरले आहे.
वाणी गल्लीतील रहिवासी अंकुश सावदेकर यांचा १७ एप्रिलला नशिराबाद येथील दिलीप वाणी यांची कन्या गौरीशी मोठ्या थाटामाटात विवाह पार पडला विवाहानंतर नवदाम्पत्य वणीच्या देवीच्या दर्शनाला गेले होते. मात्र ३० एप्रिलला गौरीला ‘ब्रेन हॅमरेज’ झाल्याने मेंदूत रक्तस्त्राव झाला होता. यात तिचा एक हात व पाय निकामी झाला. सुरुवातीला जळगाव येथे तर नंतर मुंबईतील नायर हॉस्पिटलमध्ये तिच्यावर शर्थीचे उपचार करण्यात आले. मात्र गुरुवारी मध्यरात्री गाैरव यांची प्राणज्योत मावळली.
अंकुशचे प्रयत्न अयशस्वी
यावल येथील न्यायालयात लिपिक पदावर एक महिन्यापूर्वी नोकरीला लागलेल्या अंकुशची आर्थिक परिस्थिती बेताचीच आहे. वडील लहानपणीच वारले आहेत तर आई अंगणवाडी सेविका म्हणून काम करते. पत्नीला वाचवसाठी अंकुशला मित्रांसह दात्यांनी आर्थिक मदत दिली; पण नियतीनेे अंकुशला साथ न दिल्याने गाैरी यांचा मृत्यू झाला. या घटनेने सावदेकर परिवार सुन्न झाला आहे.
