जळगाव : भाजप नेते गिरीश महाजन यांच्या अडचणी वाढण्याची शक्यता आहे. कारण जळगावच्या मराठा विद्याप्रासारक संस्थेशी निगडीत वादातून गिरीश महाजन यांच्या विरोधात अपहरण आणि मारहाणीचा गुन्हा दाखल झाला होता. या प्रकरणी गेल्या दोन दिवसांपासून पुणे पोलिसांचे पथक जळगावात कसून चौकशी करत आहे. पथकाने जळगावात पाच जणांची चौकशी करत गाडीभर कागदपत्रे तसेच संगणक व इतर साहित्य जप्त केले आहे. जप्त गाडीभर मुद्देमाल घेवून वाहन पुण्याकडे रवाना झाले.
जळगाव मराठा शिक्षण प्रसारक संस्थेशी संबंधित कागदपत्र ही भोईटे आणि आणखी एक आरोपी तानाजी यांच्या घरी मिळून आली आहेत. जी कागदपत्रं संस्थेत असणं आवश्यक आहेत ती दुसरीकडं आढळल्यानं या कागदपत्रांतून मोठे लीड मिळण्याची शक्यता असल्याची माहिती पुणे पोलिसांनी दिली आहे.
नेमकं प्रकरण काय?
जळगावच्या मराठा विद्याप्रासारक संस्थेशी निगडीत वादात दाखल गुन्ह्यावरून ही कारवाई करण्यात आल्याचं कळतंय. सुरुवातीला जळगाव जिल्ह्यातील रावेर तालुक्यातील निंभोरा पोलीस ठाण्यात दाखल झाला होता. नंतर कोथरूड पोलीस ठाण्यात गुन्हा वर्ग करण्यात आला आहे. अ‌ॅड. विजय पाटील यांनी भाजप नेते गिरीश महाजन यांच्यासह इतरांविरुद्ध गुन्हा दाखल केला आहे.
