भडगाव : तालुक्यातील आमडदे येथील महाराष्ट्र ग्रामीण बँकेत शेतकरी व ग्राहक यांनी तारण ठेवलेल्या दागिन्यांची चोरी उघडकीस आल्याने खळबळ उडाली आहे. अखेर या जबरी चोरीचा उलगडा होऊन पोलीस निरीक्षक अशोक उत्तेकर व सहकाऱ्यांनी अवघ्या तीन तासात बँक कर्मचारी व त्याच्या दोन साथीदार यांना ताब्यात घेत या जबरी चोरीचा पर्दाफाश केला आहे. या जबरी चोरीमुळे तालुक्यात मोठी खळबळ उडाली आहे.
घटनास्थळी जिल्हा पोलीस अधीक्षक प्रवीण मुंढे यांनी भेट देत पोलीस अधिकारी यांना पुढील तपासा बाबत सुचना केल्या आहेत. भडगाव तालुक्यातील आमडदे येथे महाराष्ट्र ग्रामीण बक शाखा असुन येथे मॅनेजर सह तीन कर्मचारी कार्यरत आहे. २२ नोव्हेंबर रोजी रात्री १ ते २.३० वाजेच्या दरम्यान महाराष्ट्र ग्रामीण बँकेत चोरी झाल्याची माहिती गावात पसरली. चोरी झाल्याची माहिती कर्मचाऱ्यांनी गावातील नागरीकांना दिली. यावेळी घटनेची माहिती भडगाव पोलिसांना देण्यात आली. पोलीस घटनास्थळी पोहोचतात बँकेत चोरी करताना चोरांकडुन बँकेचे कुलुप तोडणे, तिजोरी फोडणे, लॉकर तोडणे असा प्रकार दिसुन येत नव्हता तसेच बँकेत असलेल्या रोकड रकमेला हात लावलेला नव्हता. यामुळे यात बँकेतीलच कर्मचार्यांचा सहभाग असावा, असा संशय प्रथमदर्शनी येत होता. दरम्यान, याच बँकेच्या मागे राहणारा शिपाई राहुल पाटील यास विचारपुस करत माहिती घेतली असता व पोलिसी खाक्या दाखवतात त्याने पोपटासारखी चोरीची कबुली दिली. या जबरी चोरीप्रकरणी बँक शिपाई राहुल पाटील व त्याच्या अन्य दोन साथीदार यांना ताब्यात घेण्यात आले आहे. यात आरोपींच्या संख्येत वाढ होण्याची शक्यता पोलिसांकडून वर्तविली जात आहे. यावेळी जळगाव येथील श्वान पथक पाचारण करण्यात आले होते. दरम्यान, भडगाव पोलीसांनी ताब्यात घेतलेला आरोपी कर्मचारी व अन्य दोन साथीदार यांना बोलते करत जबरी चोरी घटनेतील मुद्देमाल कुठे लपविला आहे याबाबत खात्री करत तिघा आरोपींपैकी एका आरोपीच्या आमडदे शेत शिवारातील जोगडाकडील शेतात व आंचळगाव रस्त्याकडील शेतात खड्डा करुन लपविलेले दागिणे आरोपीनी काढुन दिले.
