भुसावळ प्रतिनिधी | भुसावळ जळगाव दरम्यानच्या साकेगाव जवळ तिहेरी अपघातात भुसावळचा दुचाकीस्वार तरुण जागीच ठार झाल्याची घटना घडलीय. भुसावळकडून जळगावकडे राँग साइडने जाणाऱ्या ट्रॉलाने समोरून येणाऱ्या पिकअप व्हॅनला धडक दिली. या वाहनांमध्ये दाबले जाऊन भुसावळ येथील दुचाकीस्वार तरुण मुकेश रामकुमार परदेशी (वय ३१, रा.जामनेर रोड, रामानंद नगर, भुसावळ) हा जागीच ठार झाला. तर या अपघातात दाेघे जखमी झाले.
सविस्तर असे की, साकेगाव येथील उड्डाणपुलाच्या उतारावर शुक्रवारी रात्री सुमारे २ वाजेच्या सुमारास भुसावळकडून जळगावकडे निघालेल्या ट्रॉलाने (क्रमांक जीजे.१२-बीवाय.९५२१) जळगावकडून भुसावळकडे कोंबड्या वाहून नेणाऱ्या पिकअप व्हॅनला (क्रमांक एमएच.१४-ईएम.४४०२) धडक दिली. या वाहनांचा फटका पाठीमागून दुचाकीने (क्रमांक एमएच.१९-डीजी.०२२४) भुसावळकडे जाणाऱ्या मुकेश परदेशी (वय ३१) यास बसला. दोन्ही वाहनांमध्ये दाबल्या गेल्याने दुचाकीचा चुराडा होऊन त्याचा जागीच मृत्यू झाला. या अपघातात पिकअप व्हॅन व ट्रॉला चालक किरकोळ जखमी झाले.
जखमींना डॉ.उल्हास पाटील वैद्यकीय महाविद्यालयात दाखल करण्यात आले. दरम्यान, अपघाताची माहिती मिळताच भुसावळ तालुका पोलिस स्थानकाचे निरीक्षक विलास शेंडे, शहरचे निरीक्षक प्रताप इंगळे आणि नशिराबाद टोलनाका कर्मचाऱ्यांनी घटनास्थळी धाव घेतली. या अपघातामुळे विस्कळीत झालेली रस्त्यावरील वाहतूक पोलिसांनी सुरळीत केली. घटनेची तालुका पोलिस ठाण्यात नाेंद करण्यात अाली अाहे.
