जळगाव प्रतिनिधी | भुसावळ -जळगाव राष्ट्रीय महामार्गावरील गोदावरी हॉस्पिटलजवळच्या रेल्वे उड्डाण पुलाजवळ अज्ञात वाहनाने दिलेल्या धडकेत दोन मोटारसायकलस्वारांचा जागीच मृत्यू झाल्याची घटना आज सकाळी घडली आहे.
याबाबत असे की, सावदा येथील राजेंद्र भादू डोळे ( वय ४२; पाटीलपुरा सावदा, ता. रावेर) व शेख महेमूद शेख रज्जाक (वय५३ रा सावदा) हे दोन्ही जण मोटारसायकलवरून जळगावकडे कामानिमित्त येत होते. याच दरम्यान, राष्ट्रीय महामार्गावरील गोदावरी हॉस्पिटलजवळच्या रेल्वे उड्डाण पुलाजवळ अज्ञात वाहनाने त्यांच्या दुचाकीला जोरदार धडक दिली. त्यात दोघांचा जागेवरच मृत्यू झाला.
अपघाताची माहिती मिळताच नशिराबाद पोलिसांनी घटनास्थळी धाव घेतली असून पंचनामा केला आहे. शेवटचे वृत्त हाती आले तेव्हा या संदर्भात नशिराबाद पोलीस स्थानकात गुन्हा नोंदविण्याची प्रक्रिया सुरू होती.
