पाचोरा | शेतातून पाणी काढताना पाय घसरून विहिरीत पडल्याने ३५ वर्षीय तरूण शेतकऱ्याचा रविवारी मृत्यू झाला. दुर्दैव म्हणजे शेतकऱ्याच्या पत्नीसमोर ही दुर्घटना घडली.
लासगाव येथील कैलास सखाराम महाजन हे पत्नीसह रविवारी शेतात भेंडी तोडायला गेले होते. काम करताना कैलास महाजन हे विहीरीवर पाणी काढण्यासाठी गेले. पाय घसरल्याने ते विहिरीत पडले. विहिरीत काहीतरी पडल्याचा आवाज झाल्याने, त्यांच्या पत्नीने विहिरीकडे धाव घेतली. पती विहिरीत पडल्याचे त्यांना दिसले. त्यामुळे त्यांनी ग्रामस्थांना माहिती कळविली. मात्र तोपर्यंत कैलास महाजन यांचा मृत्यू झाला होता. मृताच्या पश्चात वृद्ध आई, वडील, पत्नी व तीन मुली असा परिवार आहे.
