बहूळा धरणाचे कृष्णा सागर नामकरण होणार – आ.किशोरअप्पा पाटील

पाचोरा –  येथील पाचोरा- जळगाव रस्त्यावरील बिल्दी गावाजवळ असलेल्या बहुळा नदीवरील धरणाचे कृष्णा सागर असे नामकरण करण्यात येणार असून याबाबतचा प्रस्ताव पालकमंत्री तथा जलसंपदामंत्री गिरीश महाजन यांच्याकडे सादर करण्यात आला असून येत्या 29 ऑगस्ट रोजी नामकरण ,फलक अनावरण व जलपूजन कार्यक्रम होणार असल्याची माहिती आमदार किशोर पाटील यांनी पत्रकार परिषदेत दिली. शिवसेना कार्यालयात शुक्रवार ता 23 रोजी सायंकाळी आमदार किशोर पाटील यांनी पत्रकार परिषद घेतली यावेळी रावसाहेब पाटील ॲड दिनकर देवरे गणेश पाटील अरुण पाटील शरद पाटील चंद्रकांत धनवडे राजेश पाटील आदी उपस्थित होते आमदार पाटील यांनी स्पष्ट केले की, बहूळा धरणासाठी माजी मंत्री कै कृष्णराव पाटील (केएम पाटील) यांनी अथक परिश्रम घेऊन तालुक्याला मोठी जलसंजीवनी दिली आहे या धरणामुळे तालुक्‍यातील सुमारे 20 गावांच्या व पाचोरा पालिकेचा पाणीपुरवठा योजनेचा विषय मार्गी लागला आहे तसेच सिंचनासाठी ही या धरणातून व्यवस्था आहे डाव्या व उजव्या कालव्याची निर्मितीही केली आहे अशा या हरितक्रांतीचे स्वप्न साकारणाऱ्या या धरणाची मुहूर्तमेढ ज्यांनी रोवली व धरण पूर्ण केले त्या माजी मंत्री कै कृष्णराव पाटील यांचे सतत स्मरण व्हावे व त्यांचे योगदान प्रकाश झोतात राहावे म्हणून कृष्ण जन्माष्टमी च्या मुहूर्तावर बहूळा धरणास कृष्णा सागर असे नाव देण्याचा ठराव शिवसेना पदाधिकार्‍यांनी केला असून हा ठराव मंत्री गिरीश महाजन यांचेकडे पाठवला आहे .
29 ऑगस्ट रोजी सकाळी 11 वाजता नामकरण व फलक अनावरण कै के एम पाटील यांच्या सौभाग्यवती कमल पाटील यांच्या हस्ते करण्यात येणार असून जलपूजन न ही यावेळी करण्यात येईल नामकरण सोहळ्यानंतर या परिसरात कै के एम पाटील यांचा पुतळा व बगीच्या तयार करून पर्यटन स्थळ म्हणून हा परिसर विकसित करण्यासंदर्भातील मागणी वजा प्रस्ताव पर्यटन मंत्री रावळ यांच्याकडे सादर करण्यात येणार असल्याचे स्पष्ट केले
या कृष्णा सागरात बोटींच्या व्यवस्थेसह आकर्षक पद्धतीने रोषणाई व चौपाटी तयार करण्याचा मानस असल्याचे आमदार पाटील यांनी सांगितले त्यामुळे आता बहुळा धरण कृष्णा सागर या नावाने नावारूपाला येणार आहे.
फोटो= पाचोरा येथे पत्रकार परिषदेत माहिती देताना आमदार किशोर पाटील बाजूला रावसाहेब पाटील दिनकर देवरे अरुण पाटील आदि