सामनेर येथील दोन महिलांना चिरडून जाणाऱ्या वाहनचालकाची कसून चौकशी होणार का ?

जळगाव/पाचोरा(प्रतिनिधी)- तालुक्यातील सामनेर येथील मनीषा पाटील व अनिता पाटील या मॉर्निंग वॉक करणाऱ्या दोघी महिलांचा भरधाव वाहनाच्या धडककेने मृत्यू झाला होता. या महिलांचा जीव घेऊन अज्ञात वाहन चालक पसार झाला होता. पोलिसांनी या अपघाताची माहिती मिळताच घटनास्थळावर येऊन पाहणी केली होती. अपघातस्थळावरून धडक देणाऱ्या गाडीच्या स्पेअर पार्टचे तुकडे पोलिसांनी पुरावा म्हणून जमा करुन वाहनाचा तपास सुरु करुन शोरूम मधुन अपघातग्रस्त वाहन हुडकून काढले होते.

पोलिसांच्या या पथकाने वाहनाचा लावला होता शोध

पोलीस उपअधीक्षक भारत काकडे, पोलीस निरीक्षक किसनराव नजनपाटील यांच्या मार्गदर्शनाखाली एपीआय राहुल मोरे, उपनिरीक्षक दत्तात्रय नलावडे, पोलीस हवालदार प्रभाकर पाटील, विनोद बेलदार, निलेश गायकवाड यांनी तपास चक्रे गतिमान करत अवघ्या काही तासात ही गाडी शोधण्यात पोलिसांना यश मिळविले होते. एम. एच. 19 सीएफ 999 या क्रमांकाच्या कारने या महिलांना चिरडल्याचे निष्पन्न झाले असून हे वाहन वंदना बोरसे यांच्या नावाने आहे.दरम्यान सदर वाहन चालविणाऱ्या चालकाने स्वतःला पोलिसांसमोर हजर झाल्याची माहिती मिळाली होती. परंतु याप्रकरणी पोलिसांनी वाहनचालकाची कसून चौकशी करावी किंवा वाहन पुणे येथून ज्या ठिकाणाहून निघाली त्या ठिकाणचे किंवा प्रवासादरम्यानचे पेट्रोल पम्प, टोल प्लाझा येथील सीसीटीव्ही फुटेज मिळवून अधिकचा तपास केल्यास वाहनात कोण कोण होते वाहन कोण चालवीत होतं हे निष्पन्न होईल.