धरणगाव :- तालुक्यातील पिंप्रीजवळील कोळसा बनविण्याऱ्या कारखान्यात गॅसने भरलेला बॉयलर फुटल्याने एका कामगाराचा जागीच मृत्यू झाल्याची घटना आज सकाळी 6 वाजेच्या सुमारास घडली. नरोत्तम मारोती भोयार (वय-46,रा. निमगाव ता.जि. गोंदीया) असे मृत कामगाराचे नाव आहे.
धरणगाव तालुक्यातील पिंप्रीजवळी प्राईम एनर्जी नावाची कंपनी आहे. या कंपनीत नरोत्तम भोयार हा गेल्या सहा महिन्यापासून ऑपरेटर म्हणून काम करत होता. या कंपनीत लाकडापासून कोळसा बनविण्याचे काम केले जाते. दरम्यान आज सकाळी 6 वाजेच्या सुमारास वॉल बंद असतांना बॉयलर सुरू होऊन गॅस मोठ्याप्रमाणावर साठला गेल्याने अचानकपणे मोठा स्फोट झाला. या स्फोटात बॉयलरचा दरवाजा नरोत्तमच्या डोक्याला लागल्याने जागीच मृत्यू झाला. ही घटना घडताच सोबत काम करणार हेल्पर किसन मोरे यांनी तातडीने माहिती कंपनीचे मालक मुंबईस्थित नेम विरचंद सोनी यांना देण्यात आली. मयत नरोत्तमचा मृतदेहा जिल्हा शासकीय महाविद्यालयात आणण्यात आला. याबाबत जिल्हा पेठ पोलीसात आकस्मात मृत्यूची नोंद करण्यात आली असून झीरो क्रमांकाने गुन्हा धरणगाव पोलीसात वर्ग करण्यात आला आहे.
