जळगाव । जळगावमध्ये गुन्हेगारीचे प्रमाण वाढतच आहे. गुन्हेगारांना खाकीचा धाकच शिल्लक राहिला नसल्याचे दिसून येतेय. दरम्यान, जळगाव शहरात तरुणाच्या खुनाची घटना समोर आल्याने खळबळ उडाली. रात्री तरुणीवर प्राणघातक हल्ला करण्यात आला होता. या जखमी तरुणावर उपचार सुरु असताना आज बुधवारी सकाळी त्याचा रुग्णालयात मृत्यू झाला. अविनाश निंबा अहिरे (वय ३५) असं मृत तरुणाचे नाव आहे.
काय आहे घटना?
शहरातील खोटेनगर परिसरात काल रात्री साडेदहा वाजेच्या सुमारास एका तरूणावर प्राणघातक हल्ला करण्यात आला होता. जळगाव तालुक्यातील कुसुंबा येथील रहिवासी असलेल्या अविनाश अहिरे हा तरूण यात गंभीर जखमी झाला होता. या हल्ल्याचे नेमके कारण समजले नसले तरी पूर्व वैमनस्यातून हे कृत्य घडल्याची प्राथमिक माहिती समोर आली आहे.
दरम्यान, या प्राणघातक हल्ल्यात जखमी झालेल्या अविनाश निंबा अहिरे यांना रात्रीच जिल्हा रूग्णालयात दाखल करण्यात आले होते. येथेच उपचार सुरू असतांना आज पहाटे त्यांनी शेवटचा श्‍वास घेतला. यामुळे त्यांच्या कुटुंबियांनी जिल्हा रूग्णालयाच्या परिसरात एकच आक्रोश केला. यामुळे या हल्ल्यात आता खुनाचे अर्थात कलम-३०२ लावण्यात येणार असल्याचे समजते. या प्रकरणी पोलिसांनी तपास सुरू केला आहे.
