कोल्हापूर : काही दिवसांपूर्वी भाजप नेते किरीट सोमय्या यांनी हसन मुश्रीफ यांच्यावर घोटाळ्याचे आरोप केले होते. त्यानंतर दोघांमध्‍ये आरोप-प्रत्यारोप सुरुच आहे. दरम्यान, सोमय्या यांनी केलेले आरोप मुश्रीफ यांनी वेळोवेळी फेटाळून लावले आहेत. आज (दि.९) मुश्रीफ यांनी व्हिडीओ ट्विट करत हे आरोप पुन्हा एकदा फेटाळून लावले. किरीट सोमय्या यांचा एक जरी आरोप खरा ठरला, तर आमदारकीचा राजीनामा देईन, अशी प्रतिक्रिया आमदार हसन मुश्रीफ यांनी दिली आहे.
माझ्या बदनामीसाठी षडयंत्र आखलं जात आहे. याचा बोलवता धनी लवकरच उघड करू, अशा इशाराही त्यांनी दिला. सोमय्यांचे गैरसमज दूर करण्यासाठी आमदार विनय कोरे आणि शिंदे गटाचे संचालक यांना किरीट सोमय्या यांच्याकडे पाठवणार असल्याचेही मुश्रीफ यांनी सांगितलं.
हे तर निव्वळ माझ्या बदनामीचे षडयंत्र…….
एक जरी आरोप खरा ठरला तर आमदारकीचा राजीनामा देईन……
शेतकऱ्यांच्या मालकीच्या कोल्हापूर जिल्हा मध्यवर्ती सहकारी बँकेला बदनाम करण्याचे पाप करू नका……. pic.twitter.com/v07g3xVp7f
— Hasan Mushrif (@mrhasanmushrif) February 9, 2023
यावेळी मुश्रीफ म्हणाले की, काल किरीट सोमय्यांनी बेताल, खोटी आणि लोकांच्यात द्वेष पसरवणारी वक्तव्य केल्याने मी त्याचा निषेध करत आहे. शेतकऱ्याच्या शेअर्सच्या पैशावर आम्ही कर्ज घेतले याचा लाभ पाहुण्यांना झाला असल्याचा आरोप किरीट सोमय्यांनी आरोप केले. हे आरोप त्यांनी केले परंतु हे आरोप खोटे आहेत.
