अकोला : झोपाळ्याच्या दोरीचा गळफास बसून एका २१ वर्षीय तरुणीचा दुर्दैवी मृत्यू झाल्याची घटना घडलीय. अकोला जिल्ह्यातील बाळापूर तालुक्यातल्या रिधोरा गावात ही घटना घडली असून कल्याणी दिपक पोटे असे मृत तरुणीचं नाव आहे. या घटनेनं तरुणीच्या कुटुंबीयांनाही मोठा धक्का बसला असून संपूर्ण रिधोरा गाव शोकसागरात बुडालाय.
याबाबत असे की, कल्याणी ही डी.एडची विद्यार्थ्यानी होती. संध्याकाळच्या सुमारास, कल्याणी पाळण्याच्या दोरीवर ती उशी टाकून बसली होती. अचानक उशी सरल्यानंतर ती खाली कोसळून बेडच्या काठावर उपडीपडली आणि झोपाळ्याचा दोर तिच्या गळ्याभोवती अडकला. यात कल्याणीच्या गळ्याचा जबर मार लागला. काही वेळ ती तशीच पडून होती.
ही घटना जेव्हा घडली तेव्हा कल्याणीची आई घराच्या गच्चीवर काम करण्यासाठी गेली होती. तर वडील बाहेरगावी कामानिमित्त गेले होते. त्यामुळे जेव्हा दोर कल्याणीच्या गळ्यात अडकला तेव्हा तिला वाचवण्यासाठी कुणीच तेव्हा तिच्यासोबत नव्हतं. त्यामुळे जेव्हा कल्याणीची आई काम आटोपून घरात आली, तेव्हा त्यांनी जे बघितलं, ते हादरवणारं होतं. कल्याणीच्या आईनं आरडाओरडा केल्यानंतर शेजारील नागरीक जमले आणि त्यांना कल्याणीला लगेचच उपचारासाठी नेलं. पण तिथं डॉक्टरांनी कल्याणीला मृत घोषित केलं. पण जेव्हा कल्याणी झोपाळ्यातील उशी सरकल्यानंतर पडली, तेव्हाच तिला मदत मिळाली असती, तर कदाचित आज ती जिवंत असती.
