जळगाव : शहरात जागतिक शाकाहार दिनानिमित श्री जैन युवा फाउंडेशनतर्फे मंगळवार १ ऑक्टोबर रोजी रतनलाल सी. बाफना ज्वेलर्स प्रायोजित शाकाहार रॅली काढण्यात येणार आहे.
प्रत्येकाने शुद्ध व सकस शाकाहार घ्यावा. दीर्घायुष्यासाठी शाकाहार महत्वपूर्ण ठरतो. यासाठी प्रचार-प्रसार रॅलीतून करण्यात येणार आहे. त्याबाबतचे संदेश देणारे फलक रॅलीत असतील. श्री जैन युवा फाउंडेशनचे रॅली काढण्याचे हे दुसरे वर्ष आहे. या रॅलीला सकाळी ७.४५ वाजता शिवतीर्थ मैदानातून मान्यवरांच्या हस्ते रॅलीला हिरवी झेंडी दाखवून सुरुवात होईल. समारोप महात्मा गांधी उद्यान येथे होईल. त्यानंतर उद्यानात सभा घेतली जाणार आहे. यावेळी माजी विधानसभा अध्यक्ष अरुणभाई गुजराथी, तुषार चोथानी हे मार्गदर्शन करतील. प्रमुख पाहुणे म्हणून जिल्हाधिकारी डॉ. अविनाश ढाकणे, आयुक्त उदय टेकाळे, पोलीस अधीक्षक डॉ. पंजाबराव उगले, माजी खासदार ईश्वरलाल जैन, संघपती द्लीचंद जैन, उद्योजक अशोक जैन, गो सेवक अजय ललवाणी उपस्थित राहणार आहे.रॅलीत २५ शाळांचे विद्यार्थी, शाकाहार प्रेमी तसेच विविध संघटनांचे पदाधिकारी सहभाग घेणार आहेत. नागरिकांनी सहपरिवार उपस्थिती द्यावी असे आवाहन शाकाहार प्रणेते रतनलाल बाफना आणि श्री जैन युवा फौंडेशनचे अध्यक्ष दर्शन टाटिया, सचिव रितेश छोरीया यांनी केले आहे.
