अयोध्येत 22 जानेवारीला होणाऱ्या प्राणप्रतिष्ठा कार्यक्रमासंदर्भात काही ठिकाणी पूर्ण दिवस सुट्टी तर काही ठिकाणी अर्धा दिवस सुट्टी जाहीर करण्यात आली आहे. महाराष्ट्र सरकारने 22 जानेवारीला राज्यात सार्वजनिक सुट्टी जाहीर केली आहे. मात्र सरकारच्या या निर्णयाला मुंबई उच्च न्यायालयात आव्हान देण्यात आले आहे.
कायद्याचा अभ्यास करणाऱ्या चार विद्यार्थ्यांनी जनहित याचिका दाखल केली असून त्यावर आज म्हणजेच रविवारी सुनावणी होणार आहे. न्यायमूर्ती जे.एल.कुलकर्णी आणि न्यायमूर्ती नीला गोखले यांच्या विशेष खंडपीठासमोर या प्रकरणाची सुनावणी होणार आहे. या खटल्याची सुनावणी सकाळी 10.30 वाजता सुरू होणार आहे. जनहित याचिका दाखल करणाऱ्या विद्यार्थ्यांमध्ये शिवांगी अग्रवाल, सत्यजित सिद्धार्थ साळवे, वेदांत गौरव अग्रवाल आणि खुशी संदीप बंगिया यांचा समावेश आहे.
असा युक्तिवाद विद्यार्थ्यांनी केला
हे चार विद्यार्थी MNLU मुंबई, GLC आणि निरमा लॉ स्कूलचे आहेत. ते कायद्याचे शिक्षण घेत आहे. कोणत्याही धार्मिक कार्यक्रमासाठी सार्वजनिक सुट्टी जाहीर करणे हे धर्मनिरपेक्षतेच्या तत्त्वांचे उल्लंघन आहे, असे याचिकाकर्त्यांचे म्हणणे आहे. कोणतेही राज्य कोणत्याही धर्माशी जोडू शकत नाही किंवा त्याचा प्रचार करू शकत नाही, असा युक्तिवादही या विद्यार्थ्यांनी केला.
हिंदू मंदिराच्या उद्घाटन समारंभात उत्सव साजरा करण्याचा, उघडपणे सहभागी होण्याचा आणि अशा प्रकारे विशिष्ट धर्माशी जोडण्याचा सरकारचा हा निर्णय धर्मनिरपेक्षतेच्या तत्त्वांवर थेट हल्ला असल्याचे याचिकेत म्हटले आहे.
