सातारा : अल्पवयीन मुलींवर होणाऱ्या अत्याचाराच्या घटना थांबता थांबत नसताना अशातच माणुसकीला काळीमा फासणारी घटना समोर आली आहे. आठवीत शिकणाऱ्या एका शाळकरी मुलीची चक्क साडेतीन हजार रुपयांना विक्री करून एका महिलेने तिला अनोळखी व्यक्तीच्या हवाली केले. त्या नराधमाने मुलीला साताऱ्यातील एका लॉजवर नेऊन तिच्यावर बलात्कार केला. घडलेला प्रकार मुलीने रडत-रडतच तिच्या आईला सांगितला. याप्रकरणी संबंधित महिला व अनोळखी पुरुषावर सातारा शहर पोलीस ठाण्यात गुन्हा दाखल करण्यात आला आहे.
नेमकी काय आहे घटना?
याबाबत पोलिसांनी दिलेली माहिती अशी की, पीडित मुलगी १३ वर्षांची असून, ती आठवी इयत्तेत शिकत आहे. भारती कट्टीमणी हिने पीडित मुलीला २८ प्रिल रोजी सायंकाळी पावणेसात वाजता ‘बाहेरचे लोक येतायत. त्यांच्यासोबत फिरायला जायचे आहे,’ असं सांगितले. त्यामुळे मुलगी तिच्यासोबत फिरण्यासाठी गेली. त्यानंतर भारतीने तिला थेट साताऱ्यातील एका लॉजवर नेले. या ठिकाणी अगोदरच तेथे एक अंदाजे ४० वर्षीय अनोळखी व्यक्ती होती. त्या व्यक्तीसोबत भारतीने व्यवहार ठरवला आणि त्याच्याकडून साडेतीन हजार रुपये घेऊन तिने मुलीची विक्री केली.
नराधमाच्या ताब्यात मुलीला देऊन भारती तेथून निघून गेली. संबंधित नराधमाने त्या शाळकरी मुलीवर लॉजच्या खोलीत बलात्कार केला. या प्रकारानंतर मुलगी रडू लागल्याने तिला दमदाटी करण्यात आली.
घडलेला प्रकार मुलीने रडत-रडतच तिच्या आईला सांगितला. त्यानंतर आईने तातडीने साताऱ्यात येऊन तिच्या वडिलांना या प्रकाराची माहिती दिली. मात्र, या प्रकाराची कोठे वाच्यता होऊ नये, यासाठी काहींचे प्रयत्न सुरू झाले. परंतु पीडित मुलीच्या आईने आपल्या मुलीवर झालेल्या अन्यायाला वाचा फोडण्यासाठी कोणाच्याही दबावाला बळी न पडता नऊ दिवसांनंतर सातारा शहर पोलीस ठाण्यात धाव घेऊन तक्रार दाखल केली.
पोलिसांनी भारती कट्टीमणी हिच्यासह त्या अनोळखी नराधमावर मुलीची विक्री करून जबरदस्तीने बलात्कार करणे, बाल लैंगिक अत्याचार अधिनियम कलमांन्वये गुन्हा दाखल केला. पोलीस उपनिरीक्षक वाघमोडे अधिक तपास करीत आहेत. या घटनेची पोलिसांनी तातडीने दखल घेऊन गुन्हा दाखल केला आहे. आरोपींच्या शोधासाठी दोन पथके रवाना केली. दरम्यान, लॉजमधील सीसीटीव्हीमध्ये संबंधित आरोपी नराधमाचा चेहरा कैद झाला आहे. तो आणि भारती दोघेही पसार झाले असल्याचे पोलिसांनी सांगितले.
