मुंबई – काल लिओ टॉल्सटाय यांच्या ’वॉर अँड पीस’ या पुस्तकाचा उल्लेख करण्यात आला नव्हता. बिस्वजीत रॉय यांच्या ’वॉर अँड पीस इन जंगलमहल’ या पुस्तकाचा उल्लेख करण्यात आला होता. टॉल्सटाय यांचे ’वॉर अँड पीस’ हे पुस्तक साहित्य क्षेत्रातील अजरामर व सुप्रसिद्ध पुस्तक असल्याचे आम्हाला माहीत आहे. त्यामुळे प्रसारमाध्यमांमध्ये जे प्रसिद्ध झाले आहे, ते वेदनादायी आहे,’ असं मुंबई उच्च न्यायालयाचे न्यायामूर्ती सारंग कोतवाल यांनी स्पष्ट केलं.
नक्षली संबंधावरून अटकेत असलेले आरोपी वर्नन गोन्साल्विस यांना कोर्टाने तुमच्या घरी ’वॉर अॅण्ड पीस’ कादंबरी का आहे? असं स्पष्टीकरण मागितल्याचं वृत्त माध्यमांनी दिलं होतं. त्यावर न्यायामूर्ती सारंग कोतवाल यांनी प्रसारमाध्यमं आणि वकिलांसमोर हा खुलासा केला. टॉल्सटाय यांचे ’वॉर अँड पीस’ हे पुस्तक साहित्य क्षेत्रातील अजरामर व सुप्रसिद्ध पुस्तक असल्याचे आम्हाला माहीत आहे. त्यामुळे प्रसारमाध्यमांमध्ये जे प्रसिद्ध झाले आहे, ते वेदनादायी आहे. काल ’वॉर अँड पीस’ पुस्तकाचा उल्लेख केला नव्हता. पोलिसांच्या दस्तावेजात ज्या पुस्तकांचा उल्लेख आहे त्यात बिस्वजीत रॉय यांच्या ’वॉर अँड पीस इन जंगलमहल’ या पुस्तकाचा समावेश आहे. त्याचा उल्लेख करण्यात आला होता. शिवाय वर्नन गोन्साल्विसकडून जप्त करण्यात आलेले साहित्य हे आक्षेपार्ह असल्याचे मी म्हटले नव्हते, असं न्यायामूर्तींनी सांगितलं.
तर ’वॉर अँड पीस’ या पुस्तकासंदर्भात गोन्साल्विस यांनीही कोर्टात युक्तिवाद केला. माझ्याकडे 2 हजार पुस्तकांचा संग्रह आहे आणि त्यापैकी पुणे पोलिसांनी माझ्या घरातून जप्त केलेल्या एकाही पुस्तकावर कायद्याने बंदी नाही. शिवाय कोणतेही व कोणत्याही प्रकारचे पुस्तक मी बाळगले असले तरी जोपर्यंत त्याचा कोणत्याही गुन्ह्याशी संबंध असल्याचे पोलीस दाखवत नाहीत, तोपर्यंत ते पुस्तक माझ्याविरुद्ध पुरावा म्हणून ग्राह्य धरले जाऊ शकत नाही, असा युक्तिवाद गोन्साल्विस यांनी केला.
