मुंबई – येत्या १० जानेवारी रोजी यंदाच्या वर्षातील पहिलं चंद्रग्रहण लागणार आहे. २०२० वर्षात एकूण ६ ग्रहण लागणार आहेत. त्यात २ सूर्यग्रहण आणि ४ चंद्रग्रहणाचा समावेश आहे. या वर्षातलं पहिलं चंद्रग्रहण १० जानेवारी रोजी रात्री १० वाजून ३७ मिनिटाने सुरू होणार असून ११ जानेवारी रोजी रात्री २ वाजून ४२ मिनिटांपर्यंत चालणार आहे. सुमारे चार तास हे चंद्रग्रहण असेल. भारतासह युरोप, आशिया, आफ्रिका आणि ऑस्ट्रेलिया आदी महाद्वीपांमध्ये दिसणार आहे. यंदाचे इतर चंद्रग्रहण ५ जून, ५ जुलै आणि ३० नोव्हेंबर रोजी दिसणार आहेत.
चंद्रग्रहण का लागते?
खगोल शास्त्रानुसार चंद्रग्रहण ही निव्वळ खगोलीय घटना आहे. परिक्रमा पूर्ण केल्यानंतर पृथ्वी सूर्य आणि चंद्राच्यामध्ये येते तेव्हा चंद्र झाकला जातो आणि चंद्रग्रहण पाह्यला मिळते. जेव्हा सूर्य आणि चंद्राच्या दरम्यान पृथ्वी येते तेव्हा सूर्याची किरणं चंद्रापर्यंत पोहोचत नाही. त्यावेळी चंद्रग्रहण लागलं असं मानलं जातं. पृथ्वीच्या चोहोबाजूला फिरणारा चंद्र हा पृथ्वीचा एक उपग्रह आहे. धार्मिक मान्यतेनुसार चंद्रग्रहण आणि सूर्यग्रहण राहू केतूमुळे होते. सूर्य आणि चंद्राला राहू आणि केतू शत्रू मानतात. त्यामुळे अमावस्येच्या दिवशी सूर्य आणि पौर्णिमेच्या दिवशी चंद्र झाकला जातो, अशी धार्मिक मान्यता आहे. ग्रहणाच्या दिवशी खाण्यापिण्यापासून ते पूजाअर्चा करण्यापर्यंतची अनेक बंधनं धार्मिक मान्यतेनुसार टाकण्यात आली आहेत.
