जळगाव: महाविकासआघाडीतील अनेक मंत्र्यांचा मराठा आरक्षणाला विरोध होता. त्यामुळेच हे आरक्षण गेले, असा आरोप माजी मंत्री गिरीश महाजन यांनी केला. छत्रपती संभाजी राजे यांनी शुक्रवारी मराठा आरक्षणाबाब आपली भूमीका जाहीर केली. या भूमीकेबाबत जळगाव येथे गिरीश महाजन पत्रकारांशी बोलत होते.
महाजन पुढे म्हणाले, की भारतीय जनता पार्टीचे जेव्हा राज्यात सरकार होते तेव्हा आम्ही ते व्यवस्थित व तांत्रिक मुद्यावर उच्च न्यायालयात मांडले होते. ते टिकले देखील होते. परंतू आमचे सरकार गेले आणि तीन पक्षाचे महाविकास आघाडी सरकार आले. या तीन पक्षाचे सरकारमधील मंत्र्यांचे आपसात मतभेद असून या आरक्षणाला अर्ध्या मंत्र्यांचा विरोध आहे. ते आरक्षण देऊ नको असे म्हणत आहेत. त्यामुळेच आरक्षण गेल्याचा आरोप गिरीश महाजन यांनी केला.
संभाजीराजे छत्रपतींचा सरकारला अल्टिमेटम
खासदार संभाजीराजे छत्रपती यांनी मराठा आरक्षणासंदर्भात निर्णय घेण्यासाठी ठाकरे सरकारला 6 जूनपर्यंतची वेळ दिली आहे. संभाजीराजे यांनी पाच प्रमुख मागण्या केल्या आहेत. या मागण्या 6 जूनपर्यंत पूर्ण झाल्या नाहीतर 7 जूनपासून राज्यभरात मराठा समाज रस्त्यावर उतरले, असे संभाजीराजे यांनी सांगितले होते.
