हैदराबाद येथे झालेल्या एका पत्रकार परिषदेत ओवेसी बोलत होते. ‘मोदी कधीच ‘फादर ऑफ नेशन’ होऊ शकत नाही. त्यांची आणि गांधीजींची तुलनाच होऊ शकत नाही. ट्रम्प यांना हे माहीत असतं तर त्यांनी अशी जुमलेबाजी केली नसती. महात्मा गांधींनी हा किताब मिळवला होता. लोकांनी त्यांचा त्याग पाहून हा किताब स्वत:हून त्यांना दिला होता. पंडित नेहरू आणि सरदार पटेल हे दोघेही देशातील थोर नेते होते. पण त्यांनीही कधी कुणी ‘राष्ट्रपिता’ म्हणाले नव्हते,’ याकडंही त्यांनी लक्ष वेधलं.
‘मोदींना कुणीतरी एल्विस प्रेस्ली म्हणालं होतं. त्यात तथ्य असू शकतं. कारण, एल्विस प्रेस्ली उत्तम गायचे आणि गर्दी जमवायचे. आमचे पंतप्रधान सुद्धा चांगलं भाषण देऊन गर्दी गोळा करतात. ही तुलना कुठंतरी मेळ खाते,’ असंही ते म्हणाले. ट्रम्प हे इम्रान खान आणि नरेंद्र मोदी यांच्याशी ‘डबल गेम’ खेळताहेत. त्यांचा हा डाव समजण्याची गरज आहे,’ असा इशाराही ओवेसी यांनी दिला.
