मुंबई – भारतीय जनता पक्षानं राज्यसभेसाठी माझी उमेदवारी निश्चित केली आहे,’ अशी माहिती केंद्रीय सामाजिक न्याय राज्यमंत्री रामदास आठवले यांनी आज दिली. त्यामुळं राज्यसभेसाठी आता भाजपचा दुसरा उमेदवार कोण?; संजय काकडे की उदयनराजे भोसले यावरून तर्कवितर्कांना उधाण आलं आहे.
महाराष्ट्राच्या कोट्यातून राज्यसभेवर निवडून गेलेल्या सात खासदारांचा कार्यकाळ एप्रिल महिन्यात संपत आहे. त्या जागी वर्णी लागावी म्हणून भाजपमध्ये यावेळी जोरदार चुरस आहे. महाराष्ट्रातून साताऱ्याचे माजी खासदार उदयनराजे भोसले व विद्यमान केंद्रीय राज्यमंत्री रामदास आठवले यांची नावे चर्चेत आहेत. त्यापैकी आठवले यांनी आज विधान भवनात येऊन विरोधी पक्षनेते देवेंद्र फडणवीस, भाजपचे प्रदेशाध्यक्ष चंद्रकांत पाटील व अन्य नेत्यांची भेट घेतली. या भेटीनंतर पत्रकारांशी बोलताना, त्यांनी राज्यसभेसाठी भाजपकडून आपली उमेदवारी नक्की असल्याचं सांगितलं. ‘मी केंद्रात राज्यमंत्री असल्यानं माझी उमेदवारी निश्चित आहे, असं भाजपच्या नेत्यांनी मला सांगितलंय. भाजपकडून माझ्या नावाची अधिकृत घोषणा झाल्यानंतर मी अर्ज भरेन,’ असं त्यांनी सांगितलं.
आठवले यांची उमेदवारी निश्चित झाली असेल तर दुसऱ्या जागेवर भाजप कोणाला संधी देणार या चर्चेला ऊत आला आहे. दुसऱ्या जागेवर राष्ट्रवादी काँग्रेसमधून आलेले व लोकसभेच्या पोटनिवडणुकीत पराभूत झालेले माजी खासदार उदयनराजे भोसले यांना भाजपकडून संधी दिली जाण्याची शक्यता आहे. मात्र, या जागेसाठी राज्यसभेतील भाजपचे सहयोगी खासदार संजय काकडे यांनी दंड थोपटले आहेत. ‘भाजपनं मला मेरिटवर संधी द्यायला हवी. उदयनराजेंचं भाजपमध्ये फारसं योगदान नाही,’ असं त्यांनी याआधीच म्हटलं आहे. त्यामुळं भाजप नेमका काय निर्णय घेणार याबद्दल उत्सुकता आहे.
