भुसावळ : भुसावळ शहरातील यावल रोडवर भयंकर अपघात झाला असून एका मद्यधुंद आयशर ट्रक चालकाने आपला ट्रक थेट भरवस्तीत घातली. यात एका कुंटूंबातील एका तरुणाचा जागीच मृत्यू झाला असून एक जण जखमी झाला आहे. ही घटना आज शनिवारी सकाळी घडली आहे.
सम्राट दादाराव इंगळे (२२, डॉ.आंबेडकर नगर, भुसावळ) असे मयत तरुणाचं नाव असुन त्याचा भाऊ निलेश इंगळे हा जखमी झाला आहे. अपघातानंतर संतप्त जमावाने चालकास चोपून काढले तर दोषीवर कारवाईच्या मागणीसाठी रहिवाशांनी रस्ता रोखण्याचा प्रयत्न करीत संतप्त भावना व्यक्त केल्या.
भरधाव आयशर ट्रक (एम.एच.४६ एएफ ५५५४) वरील मद्यधूंद चालकाने शनिवारी सकाळी जळगाव रोडवरील धम्म नगरात एकाला धडक दिली व त्यानंतर यावल रस्त्यावरून वाहन जात असताना साईजीवन सुपर शॉपसमोर एका खांबाला हे वाहन धडकले. त्यानंतर चालकाचे वाहनावरील नियंत्रण सुटल्याने हे वाहन यावल रोडवरील डॉ.आंबेडकर नगरमधील वस्तीतील एका घराला जाऊन धडकल्याने सम्राट इंगळे हा तरुण जागीच ठार झाला तर भाऊ निलेश इंगळे जखमी झाला. अपघातानंतर संतप्त जमावाने चालकाला चोप दिला तर शहर पोलिसांनी वेळीच धाव घेत चालकाला ताब्यात घेतले.
