जळगाव प्रतिनिधी : राज्यभर गाजलेल्या बीएचआर घोटाळा प्रकरणातील मास्टरमाईंड सुनील झंवरला आज सोमवारी पुणे विशेष न्यायालयाने ६ सप्टेबरपर्यंत न्यायालयीन कोठडी सुनावली. त्यामुळे त्याची कारागृहात रवानगी केली.
बीएचआर घोटाळा प्रकरणी पुणे येथे गुन्हा दाखल झाल्यापासून सदर सुत्रधार सुनील झंवर हा फरार होता. मात्र दि.१० ऑगस्ट रोजी नाशिकमधून त्यास पोलीसांनी अटक केली.
पहिल्या टप्प्यात १० दिवसाची पोलीस कोठडी मिळाली होती, त्यानंतर दुसऱ्या टप्प्यात ३ दिवस कोठडी मिळाली होती. ही मुदत संपल्यानंतर सोमवारी त्याला न्या.गोसावी यांच्या न्यायालयात हजर करण्यात आले होते. १३ दिवसाच्या पोलीस कोठडीत झंवर याने आमदार मंगेश चव्हाण यांच्याशी आर्थिक संबंध असल्याचे मान्य केले आहे. त्याशिवाय पुण्यातील २२ कोटी रुपयांच्या तीन मालमत्ता अवघ्या पावणे सहा कोटी रुपयात खरेदी केल्याचेही उघड झाले.
