जळगाव प्रतिनिधी । बनावट चावीचा वापर करुन बहिणीच्या घरात डल्ला मारणाऱ्या संशयित भावाला एमआयडीसी पोलिसांनी अटक केलीय. शालक भारत अनिल कुकरेजा (वय-२९ रा. दौलत नगर, जळगाव) असे अटक केलेल्या संशयित आरोपीचे नाव आहे.
याबाबत असे की, पवन हिरालाल लालवाणी (वय ३२, रा. सिंधी कॉलनी) हे आपल्या कुटुंबियांसह राहतात. पवन लालवाणी हे खासगी नोकरी करून आपल्या कुटुंबियांचा उदरनिर्वाह करतात. मेहुणे घराबाहेर गेल्यानंतर शालकानेच बनावट चावीचा वापर करुन घरातून रोकड व दागिने असा ५१ हजार ५०० रुपयांचा ऐवज लंपास केल्याची घटना सिंधी कॉलनीत घडली होती. २२ हजार ५०० रूपयांची रोकड आणि २९ हजार रूपये किंमतीचे सोन्याचे दागिने असा एकुण ५१ हजार ५०० रूपयांचा मुद्देमाल चोरून नेला होता.
लालवणी यांच्या फिर्यादीवरून एमआयडीसी पोलीस ठाण्यात गुन्हा दाखल करण्यात आला होता. यावेळी लालवाणी यांचा शालक भारत हा अट्टल घरफोड्या असून तो घटनेच्या दिवशी शहरात असल्याची माहिती मिळाली. यानंतर पोलीसांनी तपास केला असता तो उल्हासनगर येथे पळुन गेला होता. आज २ सप्टेंबर रोजी तो जळगावात असल्याची माहिती मिळाली. त्यानुसार सहाय्यक फौजदार अतुल वंजारी, इम्रान सय्यद, सचिन मंुढे, गोविंदा पाटील, सचिन पाटील यांच्या पथकाने त्याला ताब्यात घेऊन अटक केली. भारत याने गुन्ह्याची कबुली दिली असून त्याच्याकडून लालवाणी यांच्या घरातून चोरी केलेले सोन्याचे लॉकेट मिळुन आले आहे.
