बचत खात्यावर ‘या’ बँका देताय इतके व्याज, जाणून घ्या

नवी दिल्ली : अलीकडच्या काळात मुदतठेवींवरील व्याजदरात घट झाली आहे. त्यामुळे नागरिकांनी आपले पैसे बचत खात्यात ठेवण्यास सुरूवात केली आहे. जर तुम्ही बॅंकेचे बचत खात्यात पैसे जमा करण्याचा विचार करत असाल तर ही बातमी तुमच्यासाठी आहे.

बॅंकेचे बचत खाते तुम्हाला पैसे जमा करण्याची, काढण्याची सुविधा देते त्याचबरोबर तुम्हाला बचत खात्यातील रकमेवर व्याजदेखील मिळते. बचत खात्याचे अनेक लाभ असतात. पैसे सुरक्षित ठेवणे, आर्थिक व्यवहारांसाठी वापर, व्याजदराची प्राप्ती इत्यादी. खासगी आणि सार्वजनिक क्षेत्रातील बॅंका बचत खात्यावर व्याज देतात. खासगी क्षेत्रातील छोट्या बॅंका जास्तीत जास्त ग्राहक आकर्षित करण्यासाठी एचडीएफसी बॅंक किंवा आयसीआयसीआय बॅंकेसारख्या मोठ्या बॅंकांच्या तुलनेत अधिक व्याज देतात.

जाणून घ्या कोणती बॅंक बचत खात्यावर किती व्याज देते आहे 
– डीसीबी बॅंक (DCB Bank)बचत खात्यावर ६.५ टक्क्यांपर्यत व्याज देते आहे. खासगी बॅंकांमध्ये हा सर्वाधिक व्याजदर आहे. या बॅंकेत बचत खात्यातील किमान बॅलन्सची आवश्यकता २,५०० रुपयांपासून ५,००० रुपयांपर्यत आहे.
– बंधन बॅंक (Bandhan Bank)बचत खात्यावर ६ टक्के व्याजदर देते आहे. यात बॅलन्ससाठी दरमहा सरासरी ५,००० रुपये आवश्यक असतात.
– आरबीएल बॅंक (RBL Bank)देखील बचत खात्यावर ६ टक्के व्याजदर देते आहे. यात बॅलन्ससाठी दरमहा सरासरी ५,००० रुपये आवश्यक असतात.
– येस बॅंक (Yes Bank)बचत खात्यावर ५.२५ टक्के व्याजदर देते आहे. यात बॅलन्ससाठी दरमहा सरासरी १०,००० रुपयांपासून २५,००० रुपये आवश्यक असतात.
– आयडीएफसी फर्स्ट बॅंक (IDFC First Bank) आणि इंडसइंड बॅंक (IndusInd Bank) बचत खात्यावर ५ टक्के व्याजदर देते आहे. आयडीएफसी फर्स्ट बॅंकेत दरमहा सरासरी १०,००० रुपये आवश्यक असतात. तर इंडसइंड बॅंकेत दरमहा सरासरी १,५०० रुपयांपासून ते १०,००० रुपये आवश्यक असतात.