उस्मानाबाद – राज्य सरकारने मंत्र्यांच्या बंगल्यांची डागडुजी सुरू केली असून त्यावरून भाजपचे प्रदेशाध्यक्ष चंद्रकांत पाटील यांनी सरकारवर टीका केली आहे. बंगले दुरुस्त होण्याआधीच तुम्ही जाणार आहात. बंगले कसले दुरुस्त करता? असा सवाल चंद्रकांत पाटील यांनी केला आहे.
तुळजाभवानीच्या दर्शनासाठी उस्मानाबादला आले असता चंद्रकांत पाटील यांनी प्रसारमाध्यमांशी संवाद साधला. यावेळी त्यांनी मंत्र्यांच्या बंगल्यांच्या दुरुस्तीवरून सरकारवर टीका केली. मंत्री असताना मी ए-९ नावाचा बंदला वापरला. या बंगल्याला पाच वर्षात एकदाही रंगरंगोटी केली नाही. त्यावर कोणताही खर्च केला नाही. मात्र सध्याचं सरकार बंगल्याच्या दुरुस्तीच्या नावाने भिंती पाडत आहेत. त्यासाठी खर्च करत आहेत. टेंडर न काढता पैशाची उधळपट्टी सुरू आहे. केवळ आपल्या ताटात जास्तीत जास्त ओढण्याचा हा प्रयत्न सुरू आहे. मात्र तुम्ही या बंगल्यात किती दिवस राहणार आहात? बंगले पूर्ण होण्याच्या आधीच तुम्ही जाणार आहेत. त्यासाठी किती खर्च करता?, असा सवाल पाटील यांनी केला. यावेळी त्यांनी हे सरकार पडण्यासाठी नकारार्थी प्रार्थना मी कधीच करत नाही. जोपर्यंत सरकार आहे, तोपर्यंत त्यांच्यात समन्वय राहू दे, असा टोलाही त्यांनी लगावला.
यावेळी नाइट लाइफवरूनही त्यांनी ठाकरे सरकारवर टीका केली. केवळ एका कुटुंबाला वाटले म्हणून नाइट लाइफ सुरू करण्यात आली आहे. महिला असुरक्षित असताना नाइट लाइफ सुरू करण्यात आली आहे. ही नाइट लाइफ कायदा सुव्यवस्था बिघडवणारी आणि पोलीस यंत्रणांवर ताण वाढवणारी असल्याची खोचक टीकाही त्यांनी केली.
