नवी दिल्लीः इस्रायलच्या पिगॅसस सॉफ्टवेअरद्वारे नेते, पत्रकार आणि सामाजिक कार्यकर्त्यांच्या व्हॉट्सअॅपवरील हेरगिरीवरून काँग्रेसने मोदी सरकार आणि भाजपवर हल्लाबोल केलाय. व्हॉट्सअॅपवरील हेरगिरीत थेट सरकारचा हात आहे. ज्यांचे फोन हॅक झालेत त्यांना व्हॉट्सअॅपवरून मेसेज पाठवण्यात येत आहेत. असाच मेसेज प्रियांका गांधींनाही आलाय, असं काँग्रेसचे मुख्य प्रवक्ते रणदीप सुरजेवाला यांनी सांगितलंय. ‘अबकी बार जासूसी सरकार’ आणि भाजपचे नवे नाव ‘भारतीय जासूसी पार्टी’ असं आता जनता बोलत असल्याचं सुरजेवाला म्हणाले.
पत्रकार, नेते आणि सामाजिक कार्यकर्त्यांच्या व्हॉट्सअॅपवरील हेरगिरीमागे केंद्र सरकारचा हात आहे. कारण पिगॅसस सॉफ्टवेअर हे फक्त सरकारलाच विकता येतं अन्य कुणाला विकलं जात नाही, असा आरोप सुरजेवाला यांनी केला. २०१९च्या लोकसभा निवडणुकीदरम्यान पिगॅसस सॉफ्टवेअरद्वारे पत्रकार, नेते आणि सामाजिक कार्यकर्त्यांचे फोन हॅक केले गेले आणि याची माहिती सरकारला होती, असा दावा सुरजेवाला यांनी केला.
पिगॅसस सॉफ्टवेअरद्वारे कोण कोणते इंटरनेट, ब्रॉडबँड नेटवर्क करप्ट केले याची माहिती काँग्रेसला आहे. या हेरगिरीत सुप्रीम कोर्टपासून ते खासदार आणि राज्य सरकारांची यंत्रणाही हॅक केली गेली. बीएसएनएल आणि व्हीएसएनएल चालवत असलेल्या नॅशनल इन्फॉर्मेटिक्स सेंटर जे नॅशनल इंटरनेटच्या आधारावर चालते तिथेही हे पिगॅसस सॉफ्टवेअर आढळून आलं, असं सुरजेवाला म्हणाले.
जगभरातील १४०० ग्राहकांची इस्रायलच्या पिगॅसस सॉफ्टवेअरद्वारे हेरगिरी केली गेली. यात भारतातील अनेक पत्रकार, नेते सामाजिक कार्यकर्त्यांचा समावेश आहे. पश्चिम बंगालच्या मुख्यमंत्री आणि तृणमूल काँग्रेसच्या अध्यक्ष ममता बॅनर्जी यांनीही केंद्र सरकारवर शनिवारी हेरगिरीचा आरोप केला होता.
