नाशिक – शहराला देशातच नव्हे तर संपूर्ण जगभर धार्मिकदृष्ट्या महत्त्व आहे. त्यामुळे दररोज देश विदेशातील पर्यटकांसह हजारो भाविक येथे भेट देत असतात.पण या धार्मिक स्थळाला विशेष महत्व आहे .या पंचवटी परिसरात ठाण मांडलेल्या भिकाऱ्यांचा उपद्रव दिवसेंदिवस वाढत आहे.त्यांच्याकडून पर्यटकांना देखील नेहमीच त्रास होतो.त्यामुळे मनपा व पोलीस प्रशासनाने समन्वय साधून पंचवटी परिसरातील भिकारी व निराधारांची पडताळणी करून निराधारांच्या सोयीसाठी निराधार संकुल उभारण्याची मागणी पोलीस आयुक्त व मनपा आयुक्त यांच्याकडे पंचवटी युवक विकास समितीच्या वतीने केली आहे
यावेळी दिलेल्या निवेदनात म्हटले आहे कि पंचवटी परिसरातील रामकुंड ,कपालेश्वर,राम मंदिर,सीता गुंफा ,गणेशवाडी परिसरातील भाजी मार्केट मध्ये ठाण मांडलेल्या भिकाऱ्यांचा उपद्रव दिवसेंदिवस वाढत आहे.त्यांच्याकडून पर्यटकांना देखील नेहमीच त्रास होतो.या लोकांमध्ये काही अंध,अपंग,निराधार,वृद्ध आहेत पण काही लोक जाणूनबुजून भिकारी असल्याचे भासवून येणाऱ्या भाविकांकडे पैशांची मागणी करून नाहक त्रास देतात त्यामुळे देशभरातूनच नव्हे, तर सातासमुद्रापलिकडून येणाऱ्या भाविकांप्रमाणेच पर्यटकांची नजर पडता क्षणी नाशिक शहराची वाईट प्रतिमा तयार होते.
शिवाय गेल्या काही दिवसांपासून भिकाऱ्यांची संख्या वाढत आहे त्यामुळे शहराच्या बाहेरील गुन्हेगार देखील भिकाऱ्यांच्या समवेत वावरण्याची शक्यता नाकारता येत नाही.त्यामुळे पंचवटी परिसरातील भिकाऱ्यांचे सर्वेक्षण करून त्यांचे नाव,पत्ता,ओळखपत्र तपासणी करून त्याची नोंद पोलीस ठाण्यात करण्यात यावी.शहराच्या बाहेरून आलेल्या भिकाऱ्यांची चरित्र पडताळणी करून ते खरेच गुन्हेगार नाहीत ना ? याची देखील शहनिशा करून त्यांची आरोग्य तपासणी करावी.शिवाय त्यामध्ये काम करण्यासाठी सक्षम असलेल्या भिकाऱ्यांना कामासाठी प्रवृत्त करण्यासाठी प्रयत्न करावे. शिवाय नाशिक मनपा प्रशासन व पोलीस प्रशासन यांनी समन्वय साधून अंध , अपंग,निराधार वृद्ध भिकाऱ्यांना ओळखपत्र द्यावे जेणेकरून त्याची ओळख पडताळणी सहज होऊ शकेल.
शिवाय गरजूंचे उन,वारा,पाऊस यापासून संवरक्षण व्हावे यासाठी निराधार संकुल उभारून त्याठिकाणी त्यांची व्यवस्था करावी.जेणेकरून दानशूर भाविकांना देखील मदत करण्यास सहकार्य होऊ शकेल शिवाय त्यांनी केलेली मदत देखील गरजवंत व्यक्ती पर्यंत पोहचेल आपण या समस्येकडे गांभीर्याने लक्ष देऊन योग्य ती कार्यवाही करण्याची मागणी केली आहे.यावेळी पंचवटी युवक विकास समितीचे अध्यक्ष अभिजीत राऊत, कार्याध्यक्ष किरण पानकर,उपाध्यक्ष धनंजय कोठुळे ,सरचिटणीस सचिन दप्तरे,खजिनदार अजित पाटील, चिटणीस संतोष जगताप यांच्यासह पदाधिकारी उपस्थित होते.
