जळगाव, (प्रतिनिधी)- अल्पवयीन मुलीला फूस लावून पळवून नेत तिच्यावर तीन महिने बलात्कार करणाऱ्या लखन ऊर्फ विजय रमेश गायकवाड (वय २४) रा. गिरड, ता. भडगाव याला न्यायालयाने २० वर्षे सश्रम कारावास व ४३ हजार रुपये दंडाची शिक्षा सुनावली. जिल्हा सत्र तथा विशेष पोक्सो न्यायाधीश बी. एस. महाजन यांनी बुधवारी हा निकाल दिला.
लखन गायकवाड याने २५ मे २०१८ रोजी पीडितेला फूस लावून पळवून नेत तीन महिने अत्याचार केला होता. या प्रकरणात अतुल ऊर्फ योगेश राजू गायकवाड याने मदत केली होती. याप्रकरणी पीडितेच्या आईने दिलेल्या फिर्यादीवरून भडगाव पोलिसांत दोघांविरुद्ध गुन्हा दाखल झाला होता. पोलीस उपनिरीक्षक आनंद पटारे यांनी तपास करून न्यायालयात दोषारोपपत्र दाखल केले होते, विशेष सरकारी वकील चारुलता बोरसे यांनी ११ साक्षीदार तपासले. लखन याला दोषी धरण्यात आले, तर अतुल याची सबळ पुराव्याअभावी निर्दोष मुक्तता झाली.
