जळगाव : सदरक्षणाय खलनिग्रहणाय या महाराष्ट्र पोलिसांच्या ब्रीदवाक्याचा जळगाव रेल्वेस्थानकावर नुकताच प्रत्यय आला. जळगाव रेल्वेस्थानकावर महाराष्ट्र एक्सप्रेसमध्ये चढताना पाय घसरल्याने एक महिला रेल्वे आणि प्लॅटफार्मच्यामध्ये पडत असताना पोलीस कर्मचाऱ्याने प्रसंगावधान राखत तिचा जीव वाचवला.
जिल्हा विशेष शाखेतील हवालदार दिनेश बडगुजर यांच्या कार्याचे सर्वत्र कौतुक होत आहे. पोलीस अधीक्षक डॉ.प्रवीण मुंढे यांनी देखील त्यांचे अभिनंदन केले आहे.
जळगाव रेल्वेस्थानकावर १५ फेब्रुवारीला सायंकाळी महाराष्ट्र एक्सप्रेसमध्ये चढताना सुनिता पांडूरंग बेडीस (वय ५२, रा.चाळीसगाव) हि वयोवृद्ध महिला धावत्या रेल्वेत चढण्याचा प्रयत्न करत होती. यात त्‍या वृद्धेचा पाय घसरला. धावती रेल्वेच्या पायरीवरुन पाय घसुन सुनीता बेडीस या फलाटच्या पेाकळीत कंबरेपर्यंत खाली ओढल्या गेल्या.
वृद्ध महिला धावत्या रेल्वेच्या खाली जात असल्‍याचे पाहून स्वतःच्या जीवाची परवा न करता गुन्हे शाखेतील दिनेश बडगुजर या पोलीस कर्मचाऱ्याने देान्ही खांद्यांमध्ये हात घालत विरुद्धदिशेने ओढून या महिलेसह दाम्पत्यास फलाटावर ओढले. पोलिस कर्मचार्याने दाखवलेल्या या धाडसा बद्दल आज जिल्हा पोलीस अधीक्षक डॉ प्रवीण मुंढे यांनी त्यांचा पुष्पगुच्छ देत सत्कार केला.
